BQO-da «Rýhanı jańǵyrý» aıasynda eki joba júzege asa bastady

ORAL. QazAqparat  - «Rýhanı jańǵyrý» baǵdarlamasy aıasynda Batys Qazaqstan oblysynda qos birdeı uzaq merzimdi joba júzege asyrylmaq, dep habarlaıdy QazAqparat tilshisi.

BQO mádenıet, arhıvter jáne qujattama basqarmasynyń basshysy Qadyrbolat Musaǵalıevtiń aıtýynsha, onyń birinshisi «ashyq aspan astyndaǵy Jaıyq qalashyǵy mýzeıi» bolsa, ekinshisi - «Bókeı ordasy tarıhı-mýzeı kesheni negizinde mýzeı-qoryq jasaý». Kúni búgin oblys ákimdigi men demeýshilerdiń birlesýimen jobanyń alǵashqy kezeńin júzege asyrý bastaldy. Atap aıtqanda, Jaıyq qalashyǵyna kireberiste arka ornatylýda. Oǵan qosa Bókeı ordasy aýdanyndaǵy mýzeı kesheni ornalasqan Han ordasy aýylyna aparatyn 21 shaqyrym jol qurylysy júrgiziledi. Shaǵyn avıatsııaǵa arnalǵan ushý-qoný jolaǵy da salynady.

Bulardyń ekeýi de - Qazaqstannyń qasıetti oryndary respýblıkalyq tizimine engizilgen nysandar. 

Sonymen qatar Oral qalasynda «Qasıetti Qazaqstan» maketin jasaý, basqa da birqatar keshendi sharalar, ǵylymı-zertteý ekspedıtsııalary josparlanyp otyr.

«Rýhanı jańǵyrý» baǵdarlamasynyń «Qazaqstannyń mádenı jetistikteri» negizgi baǵyty negizinde «Uly dala mádenıeti» «Aqjaıyq eli - mádenıet marjany», «Dostyq, birlik, tatýlyq», «Mádenı jaılaý» syndy qazaq mádenıetin tanytý jobasy boıynsha kitaptar men mýzeıler kórmeleri, orys kınosy aptalyǵy, Reseı Federatsııasynyń kórshiles Saratov, Volgograd, Orynbor oblystarynda qoıylymdar men kontsertter kórsetilmek», - dedi Qadyrbolat Qabdyruly.