BQO-da respýblıkalyq joldardy jóndeýge 15 mlrd teńge bólindi
ORAL. QazAqparat - Batys Qazaqstan oblysynda respýblıkalyq mańyzy joldardy qaıta salý men jóndeýge bıyl 15,126 mlrd teńge bólinip otyr, dep habarlaıdy «QazAqparat» tilshisi.
«QazAvtoJol» UK» AQ BQO fılıaly qarjylandyrý, býhgalterlik esep jáne esep berý bóliminiń basshysy Erlan Qajymovtyń aıtýynsha, «Nurly jol» baǵdarlamasy aıasynda Oral-Tasqala-RF shekarasy kúre jolynyń 100 shaqyrymyn qaıta jańǵyrtý jumysy atqarylyp jatqany belgili. Osy jobanyń nátıjesinde atalmysh jol ekinshi tehnıkalyq sanatqa aýystyrylady. Joldaǵy asfalt jamylǵysynyń eni 9 metr, jalpy eni 15 metrge jetkiziletin bolady. Joldyń eń tómengi qabatynan bastap ústine deıingi qalyńdyǵy 65 sm, sonyń ishinde asfalttyń qalyńdyǵy 27 sm bolmaq. Bıylǵy jospar boıynsha 41,6 shaqyrymǵa asfalt jamylǵysy tóselip, sý ótkizetin 68 qubyr, 6 aıaldama retke keltiriledi. Kúni búgin jyldyq jospardyń 30 paıyzy oryndalyp, 300-ge jýyq jumys orny ashyldy. Atalmysh joldyń 4-31 shaqyrymyn qaıta qurýǵa 364,1 mln. teńge qaralyp, sonyń 115,8 mln teńgesi ıgerildi. Al 31-104 km aralyǵyna 9,201 mlrd teńge berilip, 1,732 mlrd teńgeniń jumysy atqaryldy. Sonyń ishinde 5014 mln teńge 2018 jyly qalǵan 18 km joldy qaıta salýǵa jumsalmaqshy.
Oral-Tasqala-RF shekarasy jolynyń bas merdigeri «ıÝnıserv» JShS sol sekildi Chapaev-Jalpaqtal-Qaztalov jolynyń 97-157 shaqyrymyn kúrdeli jóndeýden ótkizýde. Buǵan 1,714 mlrd teńge bólinip, sonyń 294 mln teńgesi ıgerildi. Bıyl Jalpaqtaldan ári qaraı 12,5 km jolǵa asfalt tóselip, 5 kópir salynady. Jyldyq jumys jospary 38 paıyzǵa oryndalyp, 93 jumys orny ashyldy. Bul joba bitkennen keıin aýdan ortalyǵy Qaztalov aýylyna deıingi joldyń asfalt jamylǵysy joq 29 shaqyrym bóligi ǵana qalady. Qazirgi kezde munyń jobalyq-smetalyq qujattamasy aıaqtalyp keledi, qurylys jumystary aldaǵy jyly bastalady.
Qaztalov-Jánibek jolynyń 137-157 shaqyrymyn kúrdeli jóndeýge bıyl 1,118 mlrd teńge qaralyp, 9,4 shaqyrymǵa asfalt tóselip, sý ótkizetin eki qubyr salynbaq. Mundaǵy jumystyń 37 paıyzy atqaryldy (78 jumys orny). Bul jobanyń bas merdigeri - «RSÝ-1» JShS.
Bıyl sonymen qatar 133 shaqyrym joldy ortasha jóndeýge 1,726 mlrd. teńge qaraldy. Osy qarjyǵa Oral-Atyraý jolynyń 27-108 shaqyrymy (Oral men Chapaevtyń arasy), Samara-Shymkent jolynyń Melovye gorkı mańyndaǵy kópir ótkeliniń 0-16 shaqyrymy, Aqtóbe oblysynyń shekarasynan beri qaraı 490-526 shaqyrymy retke keltirilmek. Qazirdiń ózinde jumystyń 47 paıyzy atqaryldy.
Oǵan qosa avtojoldardy kútip ustaýǵa 950 mln teńge qarastyrylyp, sonyń 483 mln teńgesi ıgerildi.
