BQO-da respýblıkalyq joldar jabyldy
ORAL. QazAqparat - Batys Qazaqstan oblysynda kóktaıǵaqqa baılanysty respýblıkalyq mańyzy bar joldar jabyldy, dep habarlaıdy QazAqparat tilshisi.
BQO TJ departamentinen túsken málimetke qaraǵanda, «QazAvtoJol» UK» AQ fılıaly men BQO polıtsııa departamenti ákimshilik polıtsııa basqarmasy keshki saǵat 18.00-den bastap osyndaı sheshim qabyldady.
Atap aıtqanda, Samara-Shymkent jolynyń 266-526 shaqyrymdary aralyǵynda, ıaǵnı BQO-dan Aqtóbe oblysyna deıingi jol jabyldy. Sol sekildi Oral-Chapaev-Atyraý jolynda Chapaevtan Atyraýǵa deıingi aralyqta kólik qozǵalysyna shekteý qoıyldy. Sonymen qatar Podstepnyı-Fedorovka-RF shekarasy joly (0-144 km) jabyldy.
Eske sala keteıik, budan buryn BQO-da birneshe joldyń jabylǵanyn jazǵan bolatynbyz.
