BQO-da respýblıkalyq qusbegiler týrnıriniń jeńimpazdary anyqtaldy

Aq Jaıyq óńirinde ekinshi ret uıymdastyrylǵan saıys bul joly Terekti aýdanyndaǵy Shalqar kóli jaǵasynda ótti.

Sasaı men Santas taýlarynyń baýraıyna Aqmola, Almaty, Atyraý, Jambyl, Qaraǵandy, Mańǵystaý, Pavlodar, Túrkistan, Batys Qazaqstan oblystary men Nur-Sultan, Almaty qalalarynan qusbegiler jınaldy.

Úsh kúnge sozylǵan qusbegiler satysynyń qorytyndysynda jeńimpazdar esimi jarııa etildi.

Barlyǵy 14 búrkitshiniń arasynan nursultandyq Serikbek Kúntýǵan Alǵyrymen 50 upaı jınap, birinshi orynǵa ıe boldy. Almaty oblysynan kelgen Ǵabıt Tańatov Ótkirimen (48 upaı) ekinshi, mańǵystaýlyq Aıshýaq Taımanov Aqbalaǵymnn úshinshi orynǵa kóterildi.

Segiz ıtelgi baptaýshydan Almaty oblysynan Juldyzbegimen kelgen Qýanysh Isabekovtiń baǵy jandy. Atyraýlyq Arman Kýshkarov Sombalaǵymen, mańǵystaýlyq A.Taımanov Aqbalaǵymen ekinshi-úshinshi oryndardy bólisti.

Qarshyǵa baptaýshylardan Almaty oblysynan kelgen Saǵynysh Baetbaı Kókjendetimen aldyna jan salmady. Elordalyq Erasyl Serikbekuly Chıpogymen jáne batysqazaqstandyq Muratbek Baltabekov Ushqyrymen úzdik úshtikke ilikti.

Terekti aýdanynyń ákimi Ádil Jolamanov óńirde saıatshylyq ónerdi damytýda mundaı týrnırdiń mańyzy zor ekendigin jetkizip, oǵan aıryqsha úlesin qosyp júrgen batysqazaqstandyq ólketanýshy Aıbolat Qurymbaevqa alǵysyn bildirdi.