BQO-da respýblıkalyq jol qurylysyndaǵy jumystar aıaqtalmaı qaldy
ORAL. KAZINFORM — Batys Qazaqstan oblysynda respýblıkalyq mańyzy bar Podstepnyı-Terekti-RF shekarasy jolyn (0-36 km) qaıta jańǵyrtý jumystary tolyqtaı atqarylmaǵan.
Zańger, BQO qoǵamdyq keńesiniń múshesi Baýyrjan Ahmetjannyń málim etkenindeı, merdiger mekeme «Kazkomservıs» JShS-nyń mindetterin tolyq oryndamaǵany jóninde budan buryn da aıtylǵan bolatyn.
— Bastapqyda, 19 jeltoqsan kúni atalmysh jol bóligine qoǵamdyq baqylaý jasap, birqatar zań buzýshylyqty anyqtaǵan edim. On kúnnen keıin trassaǵa qaıta barsam, aqaýlar sol qalpynda jatyr. Tas qarańǵy, túngi jaryq shamdary qosylmaǵan. Tipti Poıma kópiriniń asfaltyn kesip, joldyń shetin qoparyp tastaǵan. Qorǵanysh kedergileri bolmaǵandyqtan, Aqsaı qalasynan Podstepnyı aýylyna qaraı nemese keri jol júrý óte qaýipti. 32 mlrd teńgege jasalǵan tas joldyń usqyny osy. Bul úshin merdigerdi kim jaýapqa tarta alady? — deıdi B.Ahmetjan.
Osyǵan oraı Kazinform tilshisine «QazAvtoJol» UK» AQ BQO fılıalynyń dırektory Asylbek Mardan jaýap berdi.
Onyń aıtýynsha, atalǵan jumystar tapsyrys berýshimen qabyldanǵan joq.
— Jol jıegindegi transheıaǵa qatysty aıtarymyz: atalǵan ýchaskelerde jol júris bóliginen sýdy jınaýǵa arnalǵan sý burý lotoktaryn tóseý jumystary júrgizildi. Kúni búgingi jaǵdaı boıynsha qalǵan jumys kólemi — 900 metr, — dedi A.Mardan.
Eske sala keteıik, budan buryn BQO-da saltanatty túrde ashylǵan jol qurylysy bitpeı qalǵany ras pa ekenin jazǵan edik.