BQO-da Respýblıka kúnine oraı jańa aýdandyq sot ǵımaraty ashyldy
ORAL. KAZINFORM – Bókeı Orda aýdanyna jumys sapary aıasynda Batys Qazaqstan oblysynyń ákimi Narıman Tóreǵalıev Saıqyn aýylyndaǵy aýdandyq sotynyń jańa ǵımaratynyń ashylý saltanatyna qatysty. Іs-shara respýblıka kúnine oraı ótti.
Aıta ketý kerek, burynǵy aýdandyq sot tozyǵy jetken aýyl shetindegi ǵımaratta ornalasqan bolatyn. Eski sot ǵımaratyna kireberis jol men kólik turaǵy da bolmaǵan. Burynǵy sottyń jumys kabınetteri tar bolǵandyqtan da qyzmetkerler men sotqa kelýshilerge qolaısyzdyq týǵyzdy.
Al, jańa sot ǵımarattyń jalpy aýdany 720 sharshy metrdi quraıdy. Іshinde keńesý bólmesi, azamattyq jáne qylmystyq isterdi qaraýǵa arnalǵan sot zaly, májilis zaly, kúzet bólmesi, muraǵat, advokat pen prokýrordyń kabınetteri bar.
Sot órt sóndirý jáne qaýipsizdik júıesimen, beınebaqylaý kameralarymen, qaýipsizdik júıelermen, qurylymdyq kabeldik jelimen jáne t.b zamanaýı qondyrǵylarmen jabdyqtalǵan.
Jańa sot ǵımaraty jergilikti bıýdjet esebinen salyndy.
Oblys ákimi Narıman Tóreǵalıev aýdan turǵyndary men sot qyzmetkerlerin osy mańyzdy oqıǵamen quttyqtady.
«Memleket Basshysy Qasym-Jomart Toqaev sot júıesin jetildirýdi, materıaldyq-tehnıkalyq bazany nyǵaıtýdy, sot qyzmetine jańa tehnologııalardy, tsıfrlandyrýdy engizýdi tapsyrǵan bolatyn. Sýdıalardyń 9-shy sezinde Prezıdentimiz Ádiletti Qazaqstandy qurýda sottardyń mańyzdy ról atqaratynyn atap ótti. Óńirimizdegi barsha sot mamandary árdaıym ádildikti tý etip, Memleket basshysynyń reformalaryn tıimdi iske asyratynyna senemin», — dep atap ótti oblys ákimi.
Ashylý saltanatyna QR Sot Ákimshiligi basshysynyń orynbasary Jantemir Shakıev, BQO oblystyq soty tóraǵasynyń m. a., sot salasynyń ardagerleri men qyzmetkerleri, sondaı-aq aýdan turǵyndary qatysty.
