BQO-da Reseımen shekarada júk kólikteriniń keptelisi nelikten týyndady

Beınejazbada júrgizýshi «Mashtakovtan» «Syrym» beketi baǵytynda eki táýlik boıy turǵanyn málimdeıdi.

Onyń sózine qaraǵanda, keptelis 15 shaqyrymǵa jetken, beıtarap aımaq júk kóligine tolǵan. Qazaqstan taraby jumys istemeı tur.

Taǵy bir beınejazbada keptelistiń 35 shaqyrymǵa jetkeni, júrgizýshilerdiń as-sýsyz qalyp otyrǵany aıtylady.

Osy máselege oraı Kazinform tilshisi BQO boıynsha memlekettik kirister departamentine arnaıy saýal joldaǵan edi.

Departamentten túsken málimetke qaraǵanda, «Syrym» avtokólik ótkizý beketinde 12 maýsymnan bastap syrtqa shyǵatyn avtokólikterdiń shoǵyrlanýy baıqalady.

Jaǵdaı oblys ákiminiń turaqty baqylaýynda. Muny retteý úshin barlyq múddeli organnyń qatysyp, oblys ákiminiń orynbasary basshylyq etetin jedel shtab quryldy.

Budan buryn «Syrym»» beketi arqyly kún saıyn 600-deı avtokólik ótetin. Qazirgi kezde qaıta qurý jáne jańǵyrtý jumystarynyń júrgizilýine baılanysty bekettiń ótkizý qabileti táýligine 500 avtokólikke deıin tómendetildi.

19 maýsym kúni departament basshylary júk tasymaldaýshylarmen kezdesip, keptelis sebebin bilý úshin «Syrym» avtokólik ótkizý beketinde boldy. Áńgime barysynda departament mamandarynyń jumysyna qatysty aryz-shaǵym aıtylǵan joq.

Kezdesý qorytyndysyna sáıkes kezektiń negizgi sebepteri anyqtaldy. Atap aıtqanda, avtokólik quraldarynyń artýy negizinen Qazaqstannyń ońtústik óńirlerinen, sondaı-aq Ózbekstan men Qyrǵyzstannan kókónis ónimderin tasymaldaýshylarǵa baılanysty. Kókónis tasymaldaýshylardyń maýsymdyq kóbeıýi táýligine beket arqyly ótetin kólik quraldarynyń jalpy sanynyń 80 paıyzdaıyn quraıdy.

Departament málimetine sáıkes júk tasymaldaýshylardyń bir bóligi «CargoRuqsat» elektrondy kezek júıesinde beketke kezekke turar aldynda tirkeledi. Mundaı tájirıbe úshinshi eldiń aýmaǵyna kirerde qoldanylady, óıtkeni «Syrym» beketi arqyly shekaradan ýaqytyly ótpegen jaǵdaıda 10 AEK kólemindegi kepildi jarna memleket paıdasyna aýdarýǵa jatady.

Kútý merzimine áser etetin qosymsha faktor Reseı Federatsııasy Federaldyq keden qyzmeti tarapynan «Mashtakov» beketinde Qazaqstannan keletin barlyq kólik quraldaryna qatysty baqylaý sharasynyń kúsheıtilýine baılanysty. Bul sharalar Máskeý men Máskeý oblysyna ushqyshsyz ushý apparattary shabýyldaýynyń jıileýine baılanysty bolyp otyr.

Bıylǵy 1 maýsymnan bastap Reseıde taýar jetkizýdi kútýdi rastaý júıesi (SPOT) engizilgen. Sondyqtan birqatar eksporterler jetkizilimniń resmıligin rastaıtyn QR-kod rásimdeý úshin reseılik alýshylardan taýardy jetkizý týraly qujatty kútedi.

Sonymen qatar júk tasymaldaýshylardyń kezekke qaramastan, «Syrym» beketi arqyly ótýdi jón kóretin sebepteri belgili boldy. Bul — janar-jaǵar maı materıaldarynyń qoljetimdiligi, «Mashtakov» beketi arqyly Reseıge kirerdegi aqyly avtojoldardyń qolaıly ornalasýy. Oǵan qosa «Mashtakov» beketindegi ınspektsııalyq-qaraý kesheni Reseı aýmaǵyna kókónis ónimderin júk kólikteriniń tehnologııalyq ótý qujatynsyz tasymaldaýǵa múmkindik beredi.

Kezekte turǵan júk tasymaldaýshylar úshin jergilikti kásipkerlermen aýyz sý jáne azyq-túlik jetkizý uıymdastyryldy.

Kezek uzyndyǵy 18 maýsymda 29 shaqyrymǵa jetse, júk tasqynyn tómendetý baǵytyndaǵy jumystar nátıjesinde 19 maýsym kúni saǵat 09.00-de 21 shaqyrymǵa deıin qysqardy.

— Júrgizýshiler arasynda kelispeýshilikke jol bermeý maqsatynda BQO polıtsııa departamenti jáne jyldam qımyldaıtyn arnaıy jasaq qyzmetkerleri beket aýmaǵyn táýlik boıy kúzetip tur. Sondaı-aq 22 maýsymnan bastap BQO boıynsha memlekettik kiris departamentiniń qyzmetkerleri polıtsııamen birlesip «Syrym» beketi aldynda kepteliske jol bermeýge baǵyttalǵan is-sharalardy turaqty atqarýda. Osy maqsatta júk kólikterin júrgizýshilermen túsinik jumystary júrgizilýde. Sonyń ishinde «CargoRuqsat» júıesine tirkelmegen júk kólikterin kempıngter men TIR-parkıngterde qoıý, júrgizýshilerdiń elektrondy kezekke sáıkes kelýi qajettigi túsindirilýde, — delingen resmı jaýapta.

Eske sala keteıik, budan buryn BQO-da Reseımen shekarada júk kólikteriniń kepteliste turǵany ras pa, sony jazǵan edik.