BQO-da Reseımen shekarada júk kólikteri taǵy da kepteliske tap boldy
ORAL. KAZINFORM — Batys Qazaqstan men Reseıdiń Samara oblysy baǵytynda «Syrym» avtokólik ótkizý beketinde júk kólikteriniń kepteliste turǵany jóninde beınejazba tarady.
Osyǵan baılanysty Kazinform tilshisi BQO boıynsha memlekettik kirister departamentine habarlasyp, jaǵdaıdy bilgen edi.
Departamentten túsken málimetke qaraǵanda, qazirgi kezde Qazaqstannan Reseıge baǵyt alǵan avtokólikterdiń kóbeıgeni baıqalady.
Munyń sebebiniń biri kókónis ónimderin eksportqa tasymaldaıtyń kólik quraldarynyń maýsymdyq jıileýine, sonymen qatar reseılik taraptyń jumys reglamentine sáıkes shekaradaǵy bekettiń ótkizý qabiletiniń shektelýine baılanysty.
Atap aıtqanda, Reseı Federatsııasy shekara qyzmeti ókilderimen kezdesý barysynda qoldanystaǵy reglamentke sáıkes avtobeket arqyly saǵatyna 25 avtokólik quraly ótetini habarlandy. ıAǵnı táýligine 500 avtokólikten aspaıdy.
- «Syrym» avtokólik ótkizý beketin qaıta jańǵyrtý jumysy jalǵasyp jatqandyqtan, merdiger uıym Qazaqstanǵa kireberiske arnalǵan qos qozǵalys jolaǵyn ýaqytsha jabýdy josparlap otyr. Soǵan baılanysty kólik qozǵalysynyń kirýi Qazaqstannan shyǵýǵa arnalǵan bir jolaqpen júrgiziledi. Al ótkizý beketiniń jumys alańy 7-den 1,5 gektarǵa deıin qysqarady, - dep habarlady vedomstvodan.
Eske sala keteıik, budan buryn BQO-da Reseımen shekarada júk kólikteriniń keptelisi nelikten týyndaǵanyn jazǵan edik.
