BQO-da reseılik áskerı tehnıka aýyl ishimen júrgen: júrgizýshige eskertý jasaldy
ORAL. KAZINFORM – Batys Qazaqstan oblysy Bókeı ordasy Saıqyn aýylynyń ishimen júrgen reseılik áskerı tehnıkanyń júrgizýshisine ákimshilik shara qoldanyldy.
BQO polıtsııa departamentiniń baspasóz qyzmetinen málim etkenindeı, reseılik júrgizýshige qatysty QR Ákimshilik quqyq buzýshylyq týraly kodeksiniń 620-babyna (jol júrisine qatysýshylarǵa qoıylatyn ózge de talaptardy buzý) sáıkes ákimshilik hattama toltyryldy.
Atalmysh bap boıynsha eskertý jasaý nemese úsh aılyq eseptik kórsetkish mólsherinde aıyppul salý qarastyrylǵan.
«Júrgizýshi kóligimen gaz qubyryn maıystyrǵan, biraq eshteńe synbaǵan, gaz shyqpaǵan. Júrgizýshige eskertý jasaldy», - dep habarlady vedomstvodan.
Eske sala keteıik, budan buryn Batys Qazaqstanda reseılik áskerı tehnıkanyń aýyl ishimen júrgenin jazǵan edik.
