BQO-da reseılik mamandar jergilikti dárigerlerge qolushyn berýde
ORAL. QazAqparat – Batys Qazaqstan oblysynda Reseıden kelgen mamandar koronavırýspen kúreste jergilikti dárigerlerge qolushyn berýde, dep habarlaıdy QazAqparat tilshisi.
BQO densaýlyq saqtaý basqarmasynyń baspasóz qyzmeti málim etkenindeı, olar ınfektsııalyq jáne provızorlyq statsıonarlarda, oblys pen qalanyń kópbeıindi aýrýhanalarynda bolyp, keńes berýde.
Máskeý oblysy Sergıev-Posad aýdandyq aýrýhanasynyń epıdemıologi Pavel Gýsev, sondaı-aq ınfektsıonıster Rıat Kantserov, Shavkatdjon Ochılov, anestezıolog-reanımatologter Adelına Matkash, Sergeı Drachýk oraldyq áriptesterimen birge naýqastardy qarap, emdeý joldaryn birlesip izdestirýde. Sonyń ishinde kúrdeli jaǵdaılarǵa erekshe mán berilýde. Álemdi jaılaǵan, buryn belgisiz bolyp kelgen indet emdeý kezinde ádis-tásilderdi qaıta qaraýdy qajet etýde. Sondyqtan mamandardyń keńesi aıryqsha mańyzdy.
Pavel Gýsevtiń sózine qaraǵanda, osyndaı indet, naýqastardyń jappaı túsýi Máskeý oblysynda da bolǵan. Keıin olarda jaǵdaı jaqsara bastaǵan. Aldymen elordaǵa kelip, sosyn óńirlerge jiberilgen reseılik mamandar Batys Qazaqstanda 14 shildeden beri jumys isteýde. Qazaqstan men Reseı arasyndaǵy kelisimge sáıkes eki eldiń mamandary koronavırýs ınfektsııasyna tosqaýyl qoıý úshin birlesip jumys istep, naqty tájirıbe almaspaqshy.
Oral qalasynda sondaı-aq Marat Ospanov atyndaǵy Batys Qazaqstan memlekettik medıtsına ýnıversıtetiniń (top jetekshisi, nevrologııa kafedrasynyń meńgerýshisi Aıgúl Ótepqalıeva) mamandary da óz mamandyǵy boıynsha batysqazaqstandyq dárigerlerge keńes berýde.
BQO taýarlar men kórsetiletin qyzmetterdiń sapasy men qaýipsizdigin baqylaý departamentinen alynǵan málimetke qaraǵanda, óńirde epıdemıologııalyq ahýal áli de qubylmaly bolyp otyr.
Osy kezge deıin koronavırýsqa shaldyqqan 4 435 adam tirkelse, sonyń ishinde klınıkalyq belgisi bar 2 210 naýqas 1 681 oshaqta anyqtalǵan. Sonyń 1 427-si Oral qalasynda, Aqjaıyq aýdanynda – 115, Bókeı ordasynda – 36, Bórlide – 114, Jańaqalada – 20, Jánibekte – 77, Báıterekte – 147, Qaztalovta – 18, Qaratóbede – 24, Syrymda – 49, Tasqalada – 59, Terektide – 104, Shyńǵyrlaýda 20 adamnyń indet juqtyrǵany belgili boldy.
1-16 shilde aralyǵynda oblysta klınıkalyq aýrý belgileri bar 1 586 adam tirkelgen.
Óńirde 3 388 adam jazylyp shyqsa, 22 adam kóz jumdy.
