BQO-da Reseıden veıpterdi ákelmek bolǵan turǵynǵa jaza kesildi
ORAL. KAZINFORM — Batys Qazaqstan oblysynda «Kıberqadaǵalaý» júıesi arqyly elektrondyq tutyný júıelerin (veıpterdi) jáne ilespe taýarlardy jarnamalap, taratqan 20 Telegram-arna buǵattaldy.
Batys Qazaqstan oblysy boıynsha ekonomıkalyq tergep-tekserý departamentiniń baspasóz qyzmetinen málim etkenindeı, Qazaqstan Respýblıkasynyń aýmaǵynda elektrondyq tutyný júıelerin (veıpterdi), sondaı-aq olarǵa arnalǵan suıyqtyqtar men hosh ıistendirgishterdi ákelýge, óndirýge, ótkizý maqsatynda saqtaýǵa jáne satýǵa tolyq tyıym salynǵan.
Engizilgen tyıymǵa qaramastan, atalǵan ónimderdi zańsyz ákelý jáne taratý áreketteri, sonyń ishinde messendjerler men áleýmettik jeliler arqyly júzege asyrylý derekteri tirkelip jatyr. Mundaı áreketter zańǵa qaıshy jáne quqyq qorǵaý organdarymen joly kesilip jatyr.
Qazaqstan Respýblıkasynyń qoldanystaǵy zańnamasyna sáıkes, veıpterdiń zańsyz aınalymy úshin qylmystyq jaýapkershilik kózdelgen. Zań buzýshylarǵa iri kólemde aıyppul salý, ónimdi tárkileý, sondaı-aq 5 jylǵa deıin bas bostandyǵyn shekteý nemese aıyrý túrindegi jaza qoldanylýy múmkin.
Departament derekterine qaraǵanda, veıpterdi jetkizý arnalary men zańsyz saýdany anyqtaý jáne jolyn kesý maqsatynda jedel izdestirý jáne profılaktıkalyq is-sharalar turaqty túrde júrgizilip keledi.
Bıyl Reseı Federatsııasyndaǵy ınternet-dúken arqyly 50 elektrondyq tutyný júıesine (veıpke) tapsyrys berip, olardy logıstıkalyq fırmanyń qyzmetin paıdalana otyryp, Qazaqstanǵa ákelmek bolǵan azamatqa qatysty aıyptaý úkimi shyǵaryldy.
Logıstıkalyq kompanııa ókilderi taýardy ákele jatqanda olardy shekaralyq baqylaý qyzmetkerleri tekserip, veıpterdi tárkilegen.
- Tergeý barysynda azamat óz kinásin moıyndap, sot úkimimen ol 1 jylǵa bas bostandyǵyn shekteý jazasyna kesildi. Veıpterdiń zańsyz aınalymy kóbine kóleńkeli sektorda, salyq tólemeı júzege asyrylady, bul memleket ekonomıkasyna zııan keltiretinin aıta ketken jón. Quqyqtyq saldardan bólek, veıpter azamattardyń, ásirese, kámeletke tolmaǵandardyń densaýlyǵyna eleýli qaýip tóndiredi, nıkotınge táýeldiliktiń qalyptasýyna jáne aǵzaǵa keri áser etýine yqpal etedi, - dep habarlady vedomstvodan.
Eske sala keteıik, budan buryn Batys Qazaqstanda veıpterdi zańsyz ákelgender sottalǵanyn jazǵan edik.
