BQO-da Reseıden kelgen jambyldyq jumysshydan koronavırýs tabyldy
ORAL. QazAqparat – Batys Qazaqstan oblysynda Reseıden kelgen jambyldyq jumysshydan koronavırýs anyqtaldy, dep habarlaıdy QazAqparat tilshisi.
BQO ákimdigi málim etkendeı, kórshi elde jumys isteıtin Jambyl oblysynyń turǵyny Reseımen shektesetin «Syrym» avtoótkelinen ótken kezde densaýlyǵyna shaǵymy bolmaǵan.
Algorıtmge sáıkes sanıtarlyq-karantındik beket epıdemıologtary jedel járdem shaqyryp, karantındik statsıonarǵa jatqyzylǵan.
Sonymen qatar buryn aýyrǵandarmen qarym-qatynasta bolǵan oblystaǵy 10 turǵynnan zerthanalyq synama alynǵan kezde olardyń indetke shaldyqqany anyqtaldy.
Koronavırýs juqtyrǵan taǵy bir adam – profılaktıkalyq maqsatta zerthanalyq synama alynǵan medıtsına qyzmetkeri. Endi biri – Atyraý oblysynyń Teńiz ken ornynda jumys isteıtin óńir turǵyny. Dene qyzýy kóterilgennen keıin ol provızorlyq statsıonarǵa túsken.
PTR dıagnostıkalyq zertteý qorytyndysymen barlyq 13 adamda COVID-19 dıagnozy rastalyp, oblystyq juqpaly aýrýlar aýrýhanasyna jatqyzyldy.
Naýqastarmen baılanysta bolǵandar baqylaýǵa alynyp, aýrý oshaqtarynda dezınfektsııalyq jumystar júrgizildi.
Osylaısha BQO-da aýyrǵandar sany 352-ge jetip, sonyń 189-y jazylyp shyqty.
Eske sala keteıik, budan buryn BQO-da aýrýhanaǵa júgingen aýyl turǵynynan koronavırýs tabylǵanyn jazǵan bolatynbyz.
