BQO-da Reseıden kelgen túrkistandyq stýdentten koronavırýs tabyldy
ORAL. QazAqparat – Batys Qazaqstan oblysynda Reseıden kelgen túrkistandyq stýdentten koronavırýs tabyldy, dep habarlaıdy QazAqparat tilshisi.
BQO ákimdigi málim etkenindeı, Túrkistan oblysynyń 21 jastaǵy turǵyny Samara ýnıversıtetinde oqıdy.
Reseımen shektesetin «Syrym» avtoótkelinen ótken kezde densaýlyǵyna shaǵymy bolmaǵanmen, algorıtmge sáıkes jedel járdemmen karantındik statsıonarǵa jetkizilgen.
Taǵy bir naýqas – Teńiz ken ornynda jumys isteıtin Batys Qazaqstan oblysynyń 54 jastaǵy turǵyny. Kórshi Atyraý oblysynan kelýine baılanysty karantındik statsıonarǵa jatqyzylyp, test qorytyndysy teris nátıje kórsetýine baılanysty úıinde oqshaýlanǵan. Dene qyzýy kóterilgennen keıin medıtsına qyzmetkerleri qarap, zerthanalyq synama alynǵan.
Koronavırýs anyqtalǵan qalǵan jeti naýqas – medıtsına qyzmetkerleri. Olar buryn aýrý juqtyrǵan adamdarmen qarym-qatynasta bolǵan.
PTR dıagnostıkalyq zertteý qorytyndysymen barlyǵynda COVID-19 dıagnozy rastalǵannan keıin oblystyq juqpaly aýrýlar aýrýhanasyna ornalastyryldy.
Naýqastarmen qarym-qatynasta bolǵandar medıtsınalyq baqylaýǵa alynyp, aýrý oshaqtarynda dezınfektsııalyq jumystar júrgizildi.
Osylaısha BQO-da aýyrǵandar sany 288-ge jetip, sonyń 133-i emdelip shyqty.
Eske sala keteıik, budan buryn BQO-da koronavırýs juqtyrǵandardyń deni Reseı men Atyraýdan kelgenin jazǵan bolatynbyz.
