BQO-da Reseıden kelgen Túrkistan oblysynyń úsh turǵynynan koronavırýs tabyldy
ORAL. QazAqparat – Batys Qazaqstan oblysynda koronavırýs juqtyrǵandar sany 125-ke jetti, dep habarlaıdy QazAqparat tilshisi.
Óńirde sońǵy tirkelgen úsh naýqas – Reseıde vahtalyq ádispen jumys isteıtin Túrkistan oblysynyń 20, 21 jáne 24 jastaǵy turǵyndary.
Olar Samara oblysymen shektesetin «Syrym»» avtoótkelinen ótkennen keıin densaýlyqtaryna shaǵymy bolmaǵanymen, karantındik statsıonarǵa jatqyzyldy.
Zertteý qorytyndysymen COVID-16 dıagnozy rastalǵannan keıin úsheýi de oblystyq juqpaly aýrýlar aýrýhanasyna aýystyryldy. Qazirgi kezde jaǵdaılary qanaǵattanarlyq.
Osylaısha oblysta aýyrǵandar sany 125-ke jetse, sonyń basym kópshiligi – Reseıden kelgender.
Syrqattanǵandardyń jeteýi jazylyp shyqty.
Eske sala keteıik, budan buryn Batys Qazaqstanda bir kúnde eki medıtsına qyzmetkerinen koronavırýs tabylǵanyn, arnaýly áskerı jıynǵa shaqyrylǵan 94 batysqazaqstandyqtyń qyzmetke kiriskenin, Oralda erteńnen bastap qoǵamdyq kólikter júre bastaıtynyn jazǵan bolatynbyz.
