BQO-da Reseıden kelgen stýdentten koronavırýs anyqtaldy
ORAL. QazAqparat – Batys Qazaqstan oblysynda Reseıdiń Saratov qalasynda oqıtyn stýdentten koronavırýs anyqtaldy, dep habarlaıdy QazAqparat tilshisi.
Budan buryn habarlaǵanymyzdaı, 22 sáýir saǵat 22.50-degi sońǵy málimetke sáıkes, Qazaqstanda koronavırýs taǵy 65 adamnan anyqtaldy. Sonyń ishinde Batys Qazaqstan oblysynda 4 jaǵdaı tirkeldi.
BQO-nyń shuǵyl shtabynan málim etkenindeı, bulardyń tórteýi de – oblys azamattary. Úsheýi Reseı astanasy Máskeýde jumys jasaıdy, bireýi – Saratov qalasyndaǵy JOO stýdenti.
Olar Saratov oblysymen shektesetin «Tasqala» beketinen ótken kezde densaýlyqtaryna shaǵymy bolmaǵan. Áıtse de karantındik statsıonarǵa jatqyzylyp, synama alynǵan kezde koronavırýsqa shaldyqqany belgili boldy.
Qazirgi tańda oblystyq Juqpaly aýrýlar aýrýhanasynda jatqan naýqastardyń jaǵdaıy qanaǵattanarlyq.
Syrqattanǵandarmen qarym-qatynasta bolǵandar medıtsınalyq baqylaýǵa alynyp, aýrý oshaqtarynda dezınfektsııalyq jumystar júrgizildi.
Osylaısha oblysta aýyrǵandar sany 76-ǵa jetip, sonyń ekeýi jazylyp shyqty. Osynyń ishinde 64-i – Reseıden, bireýi Atyraýdan kelgen.
