BQO-da Reseıden 150 keli ýyldyryq jetkizbek bolǵan qazaqstandyq azamat ustaldy
ORAL. QazAqparat – Batys Qazaqstan oblysynda Reseıden 150 keli ýyldyryq jetkizbek bolǵan qazaqstandyq azamat ustaldy, dep habarlaıdy QazAqparat tilshisi.
QR UQK shekara qyzmeti 2029-áskerı bólim komandıriniń orynbasary Asqar Qazbekovtiń aıtýynsha, oqıǵa 26 aqpan kúni shamamen saǵat 23.15-te «Syrym» ótkizý beketinde oryn aldy.
«Gazel» avtokóligin arnaıy quraldarmen tekserý barysynda azyq-túlik esebinde jasyrylǵan júk anyqtaldy. Alty plastmassa konteınerin qaraǵan kezde odan qujattary joq 150 kelideı aqserke ýyldyryǵy shyqty. Onyń quny aldyn ala esep boıynsha 3,5 mln teńgeni qurady.
«Qazaqstandyq azamat júkti Reseıden Qazaqstanǵa alyp ótpek bolǵan. Atalǵan oqıǵa tıisti organdarǵa habarlandy. Іs Báıterek aýdanyndaǵy Prıýral polıtsııa bólimine tapsyryldy», dedi A.Qazbekov.
