BQO-da referendým ýchaskesine ańshylar tazymen keldi
ORAL. KAZINFORM – Syrym aýdany ortalyǵy Jympıty aýylyndaǵy № 291 referendým ýchaskesinde tazy ertken jigitter kelýshiler nazaryn aýdardy.
Tazyshylardyń biri Sálimjan Áýbákirov – ánshi-termeshi ári balýan.
- Tazy asyraǵanyma 5-6 jyldyń júzi boldy. «Maska» jáne «Samuryq» degen qos tazym bar. Ańǵa salǵanda, oljasyz oralyp júrgen joqpyz. Búgin senimdi serikterimizdi ýchaskege ertip kelip, óz tańdaýymyzdy jasadyq. Degenmen tazynyń tuqymyn saqtaý máselesi kún tártibinde turǵanyn aıta ketkim keledi. Óıtkeni qan aralasyp barady, - deıdi S.Áýbákirov.
Aýdaryspaqtan álem chempıonatynyń kúmis júldegeri, «Syrym batyr» kókpar komandasynyń kapıtany Tólebı Qaıyrjanov ta tazy baptap, saıatshylyqpen aınalysady.
- Kópten beri balalardy atqa minýge baýlyp kelemin. Óıtkeni jetkinshek urpaq kishkentaıynan neǵurlym sáıgúlik tizgindep, báıgege shaba bilse, ol shymyr bolyp ósedi. Namysyn jibermeı, Otan qorǵaýǵa da daıyn turady. Sondyqtan biz ulttyq sportymyzdy damyta bilýimiz kerek, - dep qosty T.Qaıyrjanov.
Sonymen qatar jympıtylyq jelaıaq, «Syrym RUNNERS» júgirý tobynyń jetekshisi Jumaǵul Moldabekov atalǵan referendým ýchaskesine júgirip kelip, alǵashqylardyń biri bolyp daýys berdi. Ol tańmen 10 shaqyrym júgirýdi daǵdyǵa aınaldyrǵan.
Eske sala keteıik, budan buryn Batys Qazaqstanda referendým kúni 489 ýchaske jumys isteıtinin jazǵan bolatynbyz.
Sondaı-aq Oralda daýys bergen tanymal ónerpaz «Atameken» ánin oryndady.
Alǵash ret daýys berýshi referendýmda óz tańdaýyn jasaǵany jóninde aıtty.