BQO-da prokýratýranyń aralasýymen bıýdjet 4,2 mlrd. teńgege tolyqty
Osy zańbuzýshylyqtardy joıý maqsatynda 1 myńnan astam qadaǵalaý aktileri engizilip, 469 zańsyz akti, sonyń ishinde 11 normatıvtik-quqyqtyq akti buzyldy. Bir jyl ishinde 28 myńnan astam azamattyń konstıtýtsııalyq quqyǵy qorǵalyp, 2,5 myń adam túrli jaýapkershilikke tartyldy. 38 qylmystyq quqyqbuzýshylyq boıynsha sotqa deıingi tergep-tekserý bastaldy. Bıýdjetke 4,2 mlrd. teńgeniń toltyrylýy qamtamasyz etilip, 243 mln. teńgeniń múlki memleketke qaıtaryldy.
Prokýratýra qyzmetkerleriniń málim etkenindeı, kez kelgen quqyqbuzýshylyqtyń aldyn alýǵa arnalǵan jobalyq tásil belsendi túrde engizilýde. Aıtalyq, 2016 jyldyń tamyzynan oblys prokýratýrasy men óńir ákimdiginiń birlesken bes jeke jobasy jáne bas prokýratýranyń taǵy bes jobasy júzege asyrylýda. Áleýmettik shıelinistiń yqtımal oshaqtarynyń kartasy oblystaǵy qoǵamdyq-saıası jaǵdaıdyń qalypty bolýyna óz yqpal-áserin tıgizýde. Sonyń nátıjesinde segiz keleli másele óz sheshimin tapty. Sol sekildi jynystyq qol suǵylmaýshylyq salasyndaǵy qylmystarǵa qarsy is-qımyl týraly joba azamattardyń quqyqtyq mádenıeti men ata-ananyń jaýapkershiligin arttyrýǵa baǵyttalyp otyr. Qazirdiń ózinde kámeletke tolmaǵandarǵa qarsy kúsh kórsetý qylmystaryn azaıtýǵa qol jetkizilip, ol 29,4 paıyzǵa tómendedi. Eki jylǵa eseptelgen «Qumar oıynsyz qala» jobasy oblys ortalyǵynda júzege asyrylýda. Kásipkerler palatasymen birlese júrgizilgen quqyqtyq-túsindirý jumystary nátıjesinde óz erikterimen aınalymnan 40 oıyn avtomaty alyndy. Májbúrli túrde 38 avtomat alynyp, 18 onlaın-kazınonyń qyzmeti toqtatyldy. Mundaǵy maqsat - qala aýmaǵyndaǵy zańsyz oıyn bıznesin tolyqtaı joıý. Sondaı-aq mal urlyǵyna qarsy birlesken is-qımyl nátıjesinde bul qylmys 18 paıyzǵa azaısa, «Tabıǵatty birge qorǵaıyq» jobasy turmystyq qaldyqtardy 101 myń tonnadan 87 myń tonnaǵa deıin qysqartýǵa múmkindik berdi. Ónerkásip qaldyqtaryn kádege jaratý kólemin arttyrý arqyly qorshaǵan ortaǵa keltiriletin zalal 72 paıyzǵa tómendedi. Ókiletti organdardyń qyzmetin tıimdi úılestirý arqyly eńbek qatynastary salasynda turaqtylyq saqtaldy. Sonyń nátıjesinde 2,5 myń jumysshyǵa 283 mln. teńge jalaqy bereshegi ýaqtyly óteldi. Oǵan qosa memlekettik kásiporyndardyń jumyspen qamtý ortalyqtaryna bos jumys oryndary týraly habarlamaýynyń 1,8 myńnan astam deregi belgili bolyp, qabyldanǵan sharalar boıynsha 437 adam eńbek ornyn tapty. Oblys prokýratýrasynyń bastamasymen qaraýsyz qalǵan 28 aýlanyń sport alańy qaıta jabdyqtalyp, 5 myńnan astam jetkinshek sportpen aınalysýǵa múmkindik aldy.
Sybaılas jemqorlyqpen kúres pármendi júrgizilýde. Aıtalyq, qadaǵalaý aktisimen Aqsaı qalasynyń ákimi Aıymgúl Tirijanova men BQO boıynsha bas memlekettik ınspektory Erlan Saparov qyzmetterinen bosatyldy. Memlekettik organdar basshylarynyń ákimshilik sybaılas quqyqbuzýshylyqqa barýynyń úsh deregi, sondaı-aq memlekettik qyzmetke kir keltiretin tártiptik teris qylyqtyń 30 deregi, sonyń 13-i memorgandar basshylarynyń is-áreketinde oryn alǵandyǵy anyqtaldy.