BQO-da prokýratýranyń aralasýymen 2,1 mlrd. teńge bıýdjetke qaıtaryldy

ORAL. QazAqparat - Batys Qazaqstan oblysynda bıylǵy birinshi jartyjyldyqta áleýmettik-ekonomıkalyq salada zańdylyqty nyǵaıtý baǵytynda 124 tekseris júrgizilip, 1 myńǵa jýyq zańbuzýshylyq anyqtaldy. Ony joıý úshin 212 prokýrorlyq akti engizildi, dep habarlaıdy «QazAqparat» tilshisi.

BQO prokýratýrasynyń baspasóz qyzmetinen túsken málimetke qaraǵanda, 9 qylmystyq quqyqbuzýshylyq boıynsha sotqa deıingi tergep-tekserý bastaldy.

Prokýrorlyq yqpal etý sharalarymen 19 zańsyz akti ózgertildi jáne buzyldy. 780 adamnyń konstıtýtsııalyq quqyǵy qorǵalyp, zań buzǵan 274 adam túrli jaýapkershilikke tartyldy.

Osyndaı sharalar nátıjesinde bıýdjet 2,1 mlrd. teńgege tolyqtyryldy. Sondaı-aq 98 mln. teńgeniń múlki memleketke qaıtaryldy.
Osy merzimde 177 jumysshy-qyzmetkerge 30,5 mln. teńge jalaqy bereshegi óteldi.

Sybaılas jemqorlyq jasaýdyń 2, sondaı-aq memlekettik qyzmetke kir keltiretin qylyq jasaýdyń 17 deregi anyqtaldy.
Agroónerkásip kesheni nysandaryn sýbsıdııalaý salasynda zańbuzýshylyq jıi oryn alýda. Sonyń saldarynan keltirilgen zalal 337 mln. teńgege baǵalanyp otyr. Sotqa deıingi tergep-tekserýdiń biryńǵaı tizilimine 14 materıal tirkelip, 1 adam sottaldy, tórt is aqtalmaıtyn negizder boıynsha toqtatyldy. Úsh usynys boıynsha 31 mln. teńgeni óndirý jóninde sheshim qabyldandy.

Turǵyn úı zańnamasynyń saqtalýyna qatysty júrgizilgen tekserister de jergilikti atqarýshy organdar qyzmetindegi kóptegen bylyqtyń betin ashyp berdi. Sonyń nátıjesinde 21 laýazymdy tulǵa tártiptik jaýapkershilikke tartylsa, sonyń ekeýi qyzmetimen qosh aıtysty.