BQO-da prekýrsorlar talaby saqtalmaǵandyqtan 93 tonna tuz qyshqylynyń aınalymy shekteldi

NUR-SULTAN. QazAqparat – Medıtsınalyq mekemelerde esirtkimen jumys isteý qaǵıdalaryn buzýǵa qatysty faktiler anyqtaldy, dep habarlaıdy QazAqparat ІІM baspasóz qyzmetine silteme jasap.

Qazaqstanda «Dopıng» jedel profılaktıkalyq is-sharasynyń kezekti kezeńi ótkizdi. 5 kúndik operatsııa barysynda osy salada qyzmet atqaratyn dárihanalar, emdeý-profılaktıkalyq mekemeler jáne óndiristik kásiporyndar sııaqty 82 sýbekt tekserilgen.

Polıtseıler esirtki quraldarynyń, psıhotroptyq zattar men prekýrsorlardyń zańdy aınalymy salasynda 21 qylmysty anyqtady, onyń ishinde 20-sy esirtki quraldary aınalysy erejesin buzýǵa qatysty.

«Mysaly, Batys Qazaqstan oblysyndaǵy aýrýhanalarynyń birinde quramynda esirtki bar 1,6 myńnan astam ampýla dárilik zattar aınalysy salasynyń qaǵıdalary buzylǵan. Osy oblystaǵy JShS qyzmetin tekserý barysynda lıtsenzııalaý normalaryn buzý faktisi anyqtaldy. Nátıjesinde anyqtalǵan buzýshylyqtardyń orny toltyrylǵanǵa deıin 93 tonna tuz qyshqylynyń aınalymy shekteldi», delingen habarlamada.

Aınalymnan esirtki quraldary men psıhotropty preparattardyń 3,7 myńnan astam tabletkasy men ampýlasy alyndy.

36 ákimshilik quqyq buzýshylyq anyqtaldy, onyń ishinde tek retsept boıynsha beriletin, quramynda kodeın bar dárini retseptisiz berýge qatysty 17 fakti tirkeldi. Bul quqyq buzýshylyq boıynsha jeke tulǵalar úshin 70 AEK-ten bastap jáne laýazymdy tulǵalar úshin 100 AEK-ten bastap aıyppul salý kózdelgen.

Operatsııa ótkizý barysynda esirtki ótkizý, kontrabanda jáne asa iri mólsherde saqtaý faktileriniń jolyn kesýge de erekshe nazar aýdaryldy.

Aıta keterligi, «Dopıng» operatsııasy kúnderi 61 esirtki qylmysy anyqtaldy, onyń ishinde 28 esirtki ótkizý faktisi, 29 fakti asa iri mólsherde esirtki saqtaý jáne 4 kontrabanda tirkeldi.