BQO-da polıtsııa talabyna baǵynbaǵan azamattar ustaldy

ASTANA. KAZINFORM – Batys Qazaqstan oblysynda polıtsııa qyzmetkerleriniń zańdy talaptaryn oryndamaǵan bir top azamat ustaldy.

Áleýmettik jelilerde Aqsaı qalasynda polıtsııa qyzmetkerleriniń talaptaryn elemeı, agressıvti minez-qulyq tanytqan azamattardyń qatysýymen bolǵan beınejazba taraǵan.

Polıtsııa málimetinshe, oqıǵa 29 naýryz kúni shamamen saǵat 05:00-de bolǵan.

– Azamattyń ótinishi negizinde polıtsııa qyzmetkerleri mas kúıdegi er adamǵa qatysty tıisti sharalar qabyldady. Tekserý barysynda onyń tanystary ózin óreskel ustap, polıtsııa qyzmetkerleriniń zańdy áreketterine kedergi keltirip, talaptaryn oryndamaǵany anyqtaldy, – dep málimdedi vedomstvodan.

Mas kúıdegi quqyq buzýshy 15 táýlikke ákimshilik qamaýǵa alyndy.

Al agressııa tanytyp, qarsylyq kórsetken ózge azamattarǵa qatysty qylmystyq is qozǵaldy. Barlyq qatysýshylar anyqtalyp, ustalǵan.

Polıtsııa azamattardy quqyq qorǵaý organdarynyń zańdy talaptaryn saqtaýǵa shaqyrdy.

– Polıtsııa qyzmetkerlerine qysym kórsetý, arandatý jáne zańdy talaptardy ádeıi oryndamaý áreketteri qatań ári prıntsıpti túrde toqtatylady, – dep eskertti vedomstvo ókilderi.

Sonymen qatar, eger azamattar polıtsııa tarapynan zań buzýshylyq boldy dep sanasa, «102» nómirine nemese ІІM-niń ózindik qaýipsizdik qyzmetine 1402 arqyly habarlasý usynylady.

Quqyq qorǵaý organdary árbir qatysýshynyń áreketine quqyqtyq baǵa beriletinin atap ótti.

Sondaı-aq turǵyndar tek resmı aqparat kózderine súıenip, jalǵan nemese burmalanǵan aqparat taratýdan bas tartýǵa shaqyryldy.

Aıta keteıik, BQO-da qamaýda otyrǵan kúdiktiniń ólimine qatysty tergeý júrgizilip jatyr.