BQO-da polıtsııa qyzmetkeri jeke kóligimen jylqyǵa soǵyldy: 1 adam kóz jumdy

ORAL. KAZINFORM – Batys Qazaqstan oblysynda polıtsııa qyzmetkeri jeke kóligimen jylqyǵa soqtyǵysty. 

BQO polıtsııa departamentiniń baspasóz qyzmetinen málim etkenindeı, oqıǵa 23 maýsymǵa qaraǵan túni Syrym aýdany Toǵanas aýylynan 6 shaqyrym jerde boldy. 

«1993 jylǵy polıtsııa qyzmetkeri «Lada Prıora» avtokóligimen kele jatyp, jylqyǵa soǵyldy. Sodan keıin 1972 jylǵy júrgizýshi «Folksvagen Passat» kóligimen atalǵan kóliktiń artynan kelip túıgen. Jol apaty saldarynan «Folksvagen Passat» avtokóliginiń júrgizýshisi oqǵıa ornynda kóz jumdy. Mal ıesine QR Ákimshilik quqyqbuzýshylyq kodeksiniń 408-babyna (aýyl sharýashylyǵy janýarlaryn jaıý qaǵıdalaryn buzý) sáıkes ákimshilik hattama toltyryldy. Tıisti saraptamalar taǵaıyndaldy. Qazirgi kezde osy derek boıynsha QR QK 345-baby 3-bóligine sáıkes sotqa deıingi tergeý amaldary júrgizilýde», - dep habarlady vedomstvodan. 

BQO densaýlyq saqtaý basqarmasy baspasóz qyzmetiniń naqtylaýynsha, shaqyrtý 22 maýsym kúni saǵat 23.46-da túsken. Er adam jedel járdem kóligi jetkenshe qaıtys boldy. Ekinshi er adam Oraldaǵy qalalyq kópbeıindi aýrýhanaǵa jetkizilip, oǵan qajetti medıtsınalyq kómek kórsetildi. Sondaı-aq oǵan mbýlatorlyq em taǵaıyndalyp, keıin úıine jiberildi.

Eske sala keteıik, budan buryn Oralda oq jaraqatyn alǵan polıtsııa qyzmetkeriniń jansaqtaý bóliminde jatqanyn jazǵan bolatynbyz.