BQO-da polıtsııa qyzmetkeri avtokóligimen qaǵyp ketken áıel kóz jumdy
ORAL. KAZINFORM – Batys Qazaqstan oblysynda polıtsııa qyzmetkeri avtokóligimen áıel adamdy qaǵyp ketti.
BQO polıtsııa departamentiniń baspasóz qyzmetinen málim etkenindeı, oqıǵa 24 qańtar kúni Tasqala aýdany ortalyǵy Tasqala aýylynda boldy.
Mitsubishi avtokóliginiń júrgizýshisi dúken janynda artqa qaraı júrgen kezde belgilenbegen jerden joldan ótip bara jatqan áıeldi basyp ketken.
- Jol apaty saldarynan jaıaý júrginshi oqıǵa ornynda kóz jumdy. Medıtsınalyq kýálandyrýǵa sáıkes júrgizýshi ishimdik ishpegen. Ol ýaqytsha ustaý ızolıatoryna qamaldy. Qazirgi kezde QR QK 345-baby 3-bóligine sáıkes sotqa deıingi tergeý amaldary júrgizilýde. Avtokólik rýlinde Tasqala aýdany polıtsııa bóliminiń qyzmetkeri bolǵan. Ol ishki ister organynan qýyldy, - dep habarlady vedomstvodan.
Eske sala keteıik, budan buryn Batys Qazaqstan oblysynda 44 jylqyny urlaǵan barymtashylar tobynyń ustalǵanyn jazǵan bolatynbyz.