BQO-da polıtseıler tolǵaǵy qysqan áıeldi perzenthanaǵa jedel jetkizdi
ASTANA. KAZINFORM — Oqıǵa 2 qyrkúıek kúni tańǵy saǵat 6:30 shamasynda Podstepnoe aýylynyń mańynda bolǵan, dep habarlaıdy Polisia.kz.
Qyzmet barysynda patrýldik polıtsııa ınspektorlary Rysbek Aǵzamov pen Rınat Bıgalıevke kólik júrgizýshisi júginip, júkti áıelin aýrýhanaǵa alyp bara jatqanyn, jubaıynyń tolǵaǵy bastalǵanyn aıtqan.
Jaǵdaıdy birden baǵalaǵan polıtseıler ýaqyt joǵaltpaı, erli-zaıyptyǵa kómek kórsetý týraly sheshim qabyldaǵan. Olar kólikke ilesip, perzenthanaǵa deıin jol bastap barǵan.
Patrýldik polıtsııa qyzmetkerleriniń jedel áreketi men kásibı sheberliginiń arqasynda erli-zaıypty medıtsınalyq mekemege qysqa ýaqytta jetken. Kóp uzamaı áıel aman-esen sábıin dúnıege ákeldi.
Keıin jas áke polıtsııa qyzmetkerlerine alǵysyn bildirip, hat joldaǵan.
— Sol sátte ár mınýttyń mańyzy zor boldy. Polıtsııa qyzmetkerleri jaǵdaıdy birden túsinip, bizge kómek kórsetti. Olardyń jedel áreketiniń arqasynda aýrýhanaǵa ýaqytynda jettik. Kásibıligi, beıjaı qaramaı, adamgershilik tanytqany úshin olarǵa zor alǵysymyzdy bildirgimiz keledi. Biz muny eshqashan umytpaımyz, — dep jazdy ol óz hatynda.
Bul oqıǵa polıtsııa qyzmetkerleriniń kez kelgen jaǵdaıda azamattarǵa jedel kómek kórsetýge daıyn ekenin taǵy bir márte kórsetti.
Buǵan deıin BQO-da 14 jastaǵy qyzdyń júkti bolýyna baılanysty tergeý júrgizilip jatqanyn jazǵanbyz.
