BQO-da polıtseıler 1,3 mln teńgeniń alaıaqtarǵa aýdarylýyna tosqaýyl boldy

ORAL. KAZINFORM — BQO-da polıtseıler taban astynda 1,3 mln teńgesinen aıyrylyp qala jazdaǵan turǵynǵa kómektesip, alaaıaqtardan arashalap qaldy. Bul týraly Polisia.kz jazdy.

Aldyn alý sharalaryn ótkizý barysynda polıtsııa qyzmetkerleri qaladaǵy saýda oıyn-saýyq ortalyqtarynyń birinde termınal janynda turyp, bir ýaqytta telefonmen sóılesip turǵan er adamdy baıqaıdy.

— Er adamnyń derekterdi engizý kezinde ýaıymdap, asyǵys áreket etýi kúmán týdyrǵan. Polıtseıler aralasyp, telefonnyń ar jaǵynda alaıaqtar bolýy múmkin ekenin túsindirýge tyrysqan. Alaıda er adam aqshany aýdarýǵa tabandap turyp alǵan. Telefon tutqasyndaǵy ózin «Tamara» dep tanystyrǵan áıel oǵan eshkimdi tyńdamaýǵa keńes berip, birneshe mınýttan keıin «qyzy» men «uly» da áńgimege qosylǵan, — delingen habarlamada.

Keıin belgili bolǵandaı, birneshe kún boıy alaıaqtar er adamǵa telefon shalyp, ózderin polıtsııa qyzmetkerleri retinde tanystyryp, onyń jınaqtary qaýipte ekenin aıtyp sendirgen. Aqshany «qutqarý» úshin oǵan depozıtten qarajatty sheship, «qaýipsiz» esepshotqa aýdarý kerek bolǵan.

Polıtsııa qyzmetkerleriniń der kezinde áreket etýiniń arqasynda 1,3 mıllıon teńgeniń aýdarylýyna jol berilmedi. Telefon jáne ınternet arqyly jasalatyn alaıaqtyqtyń, ásirese zeınetkerlerge baǵyttalǵan qylmystardyń kóbeıýine baılanysty Batys Qazaqstan oblysynda polıtsııa jáne jeke kúzet qyzmetkerleri bankomattar mańynda jáne halyq kóp jınalatyn oryndarda — eń aldymen saýda oıyn-saýyq ortalyqtarynda — aldyn alý sharalaryn júrgizip jatyr.

Maqsat — «táýekel aımaǵynda» jedel áreket etý, alaıaqtarǵa aqsha aýdarýdyń aldyn alý jáne halyqtyń habardarlyǵyn arttyrý. Polıtsııa eskertedi: quqyq qorǵaý organdarynyń naǵyz qyzmetkerleri eshqashan aqsha aýdarýdy talap etpeıdi. Kúmán týdyratyn kez kelgen qońyraý kezinde birden «102» nómirine habarlasýyńyzdy suraımyz.

Eske sala keteıik, buǵan deıin Elorda turǵyny ózin aýqatty kásipker retinde tanystyryp, 4 jábirlenýshini iskerlik yntymaqtastyqty syltaýratyp, avtonesıe alýǵa kóndirgenin jazǵan edik.