BQO-da polıtseı saýsaq izderi arqyly iri páter urlyǵynyń betin ashty
ORAL.KAZINFORM – BQO-da polıtseı saýsaq izderi arqyly iri páter urlyǵynyń betin ashty. Bul týraly Polisia.kz saıty jazdy.
Krımınalısterdiń jumysyndaǵy basty qaǵıda — ol dáleldemeler men málimetterdi jınaqtaý. Qylmyskerler izderin qansha jasyrǵysy kelse de, tájirıbesi mol kásibı maman olar eskere bermeıtin aıǵaq arqyly qylmyskerdiń quıtyrqy amalyn sheship, qylmyskerlerdi áshkerelep jatady. Sondaı kásibı mamandardyń biri — Batys Qazaqstan oblysy boıynsha Oral qalalyq PB Shaǵan PB jedel-krımınalıstıkalyq tobynyń krımınalısti Rýslan Dýskalıev kúdiktilerdiń terezege qaldyryp ketken saýsaq izderi arqyly páter urlyǵyn ashty.
2023 jyly qyrkúıek aıynda «102» operatoryna jergilikti turǵyn habarlasyp, seıften mıllıondaǵan dollar urlanǵanyn habarlady. Oqıǵa ornyna dereý jedel-tergeý toby jiberildi. Anyqtalǵandaı, belgisiz bireý Oral qalasyndaǵy turǵylyqty úılerdiń birine terezesin syndyrý arqyly kirip, seıften 10 myń AQSh dollaryn jáne 3 mln 700 myń teńge (shamamen 8 mln teńge kólemindegi) aqshalaı qarajatyn qoldy qylǵan. Ýaqytyn joǵaltpaı Rýslan Dýskalıev oqıǵa ornyn, qylmyskerdiń kelip-ketý jolyn jan-jaqty tekserip shyǵady. Nátıjesinde ury kirgen terezeden qoldyń izderin tabady.
Іzderdi jedel tekserý barysynda krımınalıstıkalyq esep bazasy boıynsha kúdiktiniń kim ekeni anyqtaldy. Ol 33 jastaǵy oblys ortalyǵynyń turǵyny ekeni anyqtaldy. Júrgizilgen jedel-izdestirý is-sharalary nátıjesinde táýlikke jetpeıtin ýaqyt ishinde qylmysker ustaldy. Baǵyna oraı, kúdikti urlanǵan aqshany túgel jumsap úlgermegen. Ol tárkilenip, zańdy ıesine qaıtaryldy. Oral qalasy qylmystyq sotynyń sheshimimen kúdikti sottalyp, bes jylǵa bas bostandyǵynan aıyryldy. Úkim zańdy kúshine jaqyn arada enedi.
