BQO-da polıtsııa qyzmetkerleri kelinshekti avtokólikte bosandyryp aldy
ORAL. QazAqparat – Batys Qazaqstan oblysynda polıtsııa qyzmetkerleri kelinshekti avtokólikte bosandyryp aldy, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekovtiń málim etkenindeı, oqıǵa 26 aqpanǵa qaraǵan túni Samara-Shymkent avtojoly boıynda Syrym aýdany
Alǵabas aýyly tusynda boldy.
«VAZ-2110» avtokóligi synyp, jolda turyp qalǵan. Onyń júrgizýshisi avtokólikte júkti kelinshektiń tolǵaǵy bastalǵanyn jetkizgen. Polıtsııa leıtenanty Ernis Baqtygereev pen polıtsııa aǵa leıtenanty Tımýr Súıinálıev áıeldi patrýldik avtokólikke otyrǵyzyp, jedel járdem shaqyryp, Oralǵa bet alǵan. Jolshybaı Toǵanas aýyly mańynda kelinshek aman-esen bosanyp, tártip saqshylary shaqalaqtyń kindigin kesken. Terekti aýdany Podstepnyı
aýylyna jetkennen keıin áıel sábıimen jedel járdem dárigerlerine berildi.
Taǵy bir osyndaı oqıǵa keshe Bórli aýdanynda boldy. Aqsaı qalasynda turatyn kelinshek tolǵaǵy bastalǵannan keıin taksı shaqyrǵan. Taksı júrgizýshisi tájirıbesi az bolǵandyqtan, áıeldi barynsha tez jetkizý kerektigin jolshybaı kezdesken patrýldik polıtsııa qyzmetkerlerine aıtqan. Polıtsııa kapıtany Nursultan Bekesov pen aǵa leıtenant Erlan Órisbaev áıeldi óz kólikterine otyrǵyzyp, Bórli aýdandyq aýrýhanasyna dereý jetkizdi. Іle-shala shaqalaqtyń daýsy estildi.
Sábılerdiń ata-analary polıtsııa qyzmetkerlerine alǵysyn bildirdi.
Eske sala keteıik , budan buryn BQO-da qatty jelge baılanysty birneshe jol jabylǵanyn jazǵan bolatynbyz.
Óńirde birneshe kún boıy boran soǵyp, qar qursaýynda, jolda qalǵan adamdar boldy. Barlyq baǵyttar boıynsha joldar búgin ashyldy.
