BQO-da polıtsııa qyzmetkeri quqyq buzýshynyń aıaǵynan atty
ASTANA. QazAqparat - Batys Qazaqstan oblysynda polıtsııa qyzmetkeri jergilikti turǵynnyń aıaǵynan atty, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa Qaztalov aýdany Qaraoba aýylynda boldy.
Osy aýyldyń 30 jasar mas turǵyny ýchaskelik polıtsııa ınspektoryna baǵynbaı, betinen uryp, jerge jyqpaq bolǵan.
Polıtsııa ınspektory ózine bekitilgen travmatıkalyq tapanshadan aýaǵa eki ret oq atqan. Alaıda quqyq buzýshy oǵan toqtamaı, tóbelesti jalǵastyrǵan. Sodan keıin polıtsııa qyzmetkeri onyń aıaǵynan atqan.
Atalǵan derek QR QK 380-baby 1-bóligine sáıkes (bılik ókiline qatysty kúsh qoldaný) tirkelgen.
«Qyzmettik tekserý júrgizilýde. Aýdan prokýratýrasy tarapynan qarý qoldaný durys dep tabyldy», dep habarlady polıtsııa departamentiniń baspasóz qyzmeti.
Qaraoba aýyldyq okrýginiń ákimi Arman Ǵalymov oqıǵa barysynda eki adamnyń polıtsııa qyzmetkerine qarsylyq bildirgenin, sonyń saldarynan ýchaskelik polıtsııa ınspektorynyń travmatıkalyq qarý qoldanǵanyn rastady.
Aýyl turǵyndarynyń sózine qaraǵanda, oqıǵa 14 naýryz kúni bolǵan. Kórisý aıtyna oraı eki turǵyn úı aralap, araq ishken. Kóshede ýchaskelik polıtsııa ınspektoryna kezdesip, sodan shataq týyndaǵan. Aıaǵyna oq tıip, jaralanǵan turǵyn qazirgi aýdandyq aýrýhanada jatyr.
Eske sala keteıik, budan buryn Oralda oqýshylar tóbelesip, bireýi aýrýhanaǵa túskenin jazǵan bolatynbyz.
