BQO-da polıtsııa qyzmetkeri qaǵyp ketken er adam kóz jumdy
ORAL. QazAqparat – Batys Qazaqstan oblysynda polıtsııa qyzmetkeri kóligimen qaǵyp ketken er adam kóz jumdy, dep habarlaıdy QazAqparat tilshisi.
Oblystyq densaýlyq saqtaý basqarmasynan túsken málimetke qaraǵanda, er adam Oral qalalyq kópbeıindi aýrýhanasynyń jansaqtaý bóliminde búgin tańmen qaıtys boldy.
Budan buryn jazǵanymyzdaı, oqıǵa Tasqala aýdany ortalyǵynda oryn aldy.
Aýdandyq polıtsııa bóliminiń aǵa ınspektory Sáken Qazjanov 2 jeltoqsan kúni «Shevrole Nıva» avtokóligimen 56 jasar turǵyndy qaǵyp ketip, er adam qalalyq aýrýhananyń jansaqtaý bólimine jatqyzylǵan edi.
Polıtsııa qyzmetkerine qatysty QR QK 345-baby 2-bóligi (abaısyzda adamnyń densaýlyǵyna aýyr zııan keltirýge ákep soqqan jol júrisi nemese kólik quraldaryn paıdalaný qaǵıdalaryn buzý) jáne 347-baby 1-bóligine (jol-kólik oqıǵasy bolǵan jerden ketip qalý) sáıkes qylmystyq is qozǵalǵan bolatyn.
BQO polıtsııa departamenti baspasóz qyzmetiniń naqtylaýynsha, S.Qazjanov qyzmetinen bosatyldy. Sondaı-aq atalǵan qylmystyq is QR QK 345-baby 3-bóligine (abaısyzda adam ólimine ákep soqqan jol júrisi nemese kólik quraldaryn paıdalaný qaǵıdalaryn buzý) qaıta dárejelendi.
