BQO-da polıtseılerge para usynǵan Atyraý turǵyny men Ózbekstan azamaty ustaldy
BQO polıtsııa departamentiniń baspasóz qyzmeti málim etkendeı, oqıǵa 17 maýsym kúni Atyraý-Oral avtojolynda bolǵan.
«Shkoda Oktavııa» patrýl avtokóliginiń salonynda 1996 jylǵy atyraýlyq jáne 1985 jylǵy ózbekstandyq azamat QR Ákimshilik quqyq buzý kodeksi 592-baby 2-bóligi (belgilengen júrý jyldamdyǵyn arttyrý) jáne 230-baby 2-bóligine (Qazaqstan Respýblıkasynyń mindetti saqtandyrý týraly zańnamasyn buzý) sáıkes ákimshilik jaýapkershilikke tartpaý úshin polıtsııa qyzmetkerlerine para usynǵan.
Qazirgi kezde atalǵan derek boıynsha QR QK 367-baby 1-bóligine sáıkes tergeý amaldary júrgizilýde.
Departament bastyǵynyń orynbasary, polıtsııa polokovnıgi Nurlan Ramazanovtyń aıtýynsha, ishki ister organdaryn jańǵyrtýdyń 2019-2020 jyldarǵa arnalǵan jol kartasy aıasynda jeke quram arasynda sybaılas jemqorlyq quqyqbuzýshylyqqa jol bermeý maqsatynda aldyn alý sharalary udaıy júrgizilip keledi.
Taldaý kórsetkendeı, kóp jaǵdaıda azamattardyń ózderi polıtsııa qyzmetkerlerine para usynyp, arandatady.
Buǵan deıin jyl basynan beri polıtsııa qyzmetkerlerine para usynýdyń 16 deregi anyqtalyp, sonyń tórteýi boıynsha para berýshige qatysty aıyptaý úkimi shyqqan. Mysaly, 30 qańtar kúni K. degen azamat ákimshilik jaýapkershilikke tartpaý úshin patrýldik polıtsııa batalonynyń vzvod komandırine 5 myń teńge para bermek bolǵan. Osy zańsyz áreketi úshin oǵan 50 myń teńge aıyppul salyndy.
«Bylaı qaraǵanda, para usynǵan adam asa qatań jaýapkershilikke tartylmaıdy. Alaıda osy quqyq buzýshylyq áreketi úshin sottylyǵy bar degen belgi sol adamnyń málimetinde ómir boıy jazylyp qalady. Bul onyń jumysqa ornalasýyna kedergi keltiredi. Onyń ústine balalarynyń ómirbaıan paraqtarynda ata-anasy sottalǵan dep jazýly turady», dedi N.Ramazanov.
Eske sala keteıik, budan buryn BQO-da sybaılas jemqorlyq qylmys jasaǵan 13 adamnyń sottalǵanyn jazǵan bolatynbyz.