BQO-da polıtseılerdiń qatysýymen para alý jáne berý derekteri azaımaı otyr
Polıtsııa qyzmetindegi sybaılas jemqorlyqtyń aldyn alý máseleleri de talqylanǵan jıynda málim etilgenindeı, sybaılas jemqorlyq derekteri jóninen BQO respýblıkada
birinshi orynda ekendigi belgili. Bıylǵy jeti aıdyń qorytyndysy boıynsha óńirde 101 para alý jáne berý deregi tirkelse, sonyń 83-i polıtsııa qyzmetkerleriniń qatysýymen
bolǵan. Bul polıtsııa qyzmetkerleriniń arasynda sybaılas jemqorlyqtyń tyıylmaı otyrǵandyǵyn kórsetedi.
2017-2020 jyldary BQO polıtsııa departamentinen sybaılas jemqorlyqqa barǵan 38 qyzmetker qyzmetten qýylǵan.
Sonyń ishinde 2017 jyly – 17, 2018 jyly – 9, 2019 jyly – 2, 2020 jyly qańtarda 6 qyzmetker qyzmetimen qosh aıtysqan.
Jıynda baıandama jasaǵan BQO polıtsııa departamenti bastyǵynyń mindetin atqarýshy Janbolat Janshın bıylǵy segiz aıda jol-kólik oqıǵalarynyń 2,7, sonyń saldarynan qaza tapqandardyń 26,3 jáne jaraqat alǵandardyń 19,3 paıyzǵa azaıǵanyn jetkizdi.
Jol apattarynyń negizgi sebepteri jyldamdyqty shekten tys arttyrý (52 jol-kólik oqıǵasy nemese barlyq oqıǵanyń 29,7 paıyzy, 10 adam qaza taýyp, 33-i jaraqat alǵan), burylý
erejesin saqtamaý (23 JKO, 13,1 paıyzy, 5 adam mert bolyp, 24-i jaraqattanǵan), qıylystarda júrý tártibin buzý (32 JKO, 18,3 paıyzy, 3 adam kóz jumyp, 41-i jaraqat alǵan), jaıaý júrginshi ótkelinen júrý erejesin buzý (19 JKO, 20 adam jaraqat alǵan), jaıaý júrginshilerdiń ereje buzýy (12 JKO, 12 adam jaraqat alǵan) bolyp otyr.
Sonymen qatar kólikti mas kúıinde júrgizýshilerdiń 12,8 paıyzǵa kóbeıgeni alańdatady.
Keńes qorytyndysynda óńir basshysy oblysta jol qozǵalysy qaýipsizdigin qamtamasyz etý, sondaı-aq polıtsııa qyzmetkerleri arasynda sybaılas jemqorlyqtyń aldyn alý
baǵytynda jumystardy jalǵastyrý úshin birqatar tapsyrmalar berdi.
Eske sala keteıik, budan buryn BQO-da mas kúıinde polıtsııa qyzmetkerine kúsh kórsetip, til tıgizgenderdiń tergelip jatqanyn jazǵan edik.