BQO-da polıtseı adamdardy urdy degen derek rastalmady
ORAL. QazAqparat - BQO ishki ister departamenti Tasqala aýdandyq ishki ister bóliminiń ýchaskelik ınspektory D.Ǵalymov túsip qalǵan beınerolıktiń «Polıtsııa qyzmetkeri adamdy uryp-soqty» degen atpen taralýyna baılanysty túsinik berdi, dep habarlaıdy «QazAqparat» tilshisi.
Departamenttiń baspasóz qyzmetinen túsken málimetke qaraǵanda, atalǵan oqıǵa 7 qarasha kúni tús mezgilinde Tasqala aýyly M.Mámetova kóshesi boıyndaǵy «Vest» dəmhanasy men Y.Altynsarın atyndaǵy orta mektep mańynda bolǵan. Sol kúni ınspektor óz avtokóligimen aýdandyq sotqa bara jatyp, mektep janynda mas kúıinde júrgen úsh adamdy baıqaǵan. Osy kezde balalar sabaqtan shyǵyp jatqan.
Ýchaskelik ınspektor aýdandyq ishki ister bóliminde esepte turatyn eki adamdy tanyp, olarǵa eskertý jasap, polıtsııa bólimine baryp, sosyn medıtsınalyq kýálandyrýdan ótý úshin avtokólikke otyrýyn talap etken. Quqyq buzýshylar buǵan baǵynbaı, Ǵalymovty uıaly telefonǵa túsirgen. Degenmen polıtsııa qyzmetkeri úsheýin avtokólikke otyrǵyzyp, polıtsııa bólimine jetkizgen. Ustalǵandarǵa polıtsııa qyzmetkeri qol kótermegen.
Sol kúni qoǵamdyq orynda mas kúıinde júrgeni úshin atalǵan úsheýge ákimshilik hattama toltyrylyp, olar munymen kelisip, hattamaǵa qol qoıyp, aıyppuldy tóleýdi mindetine alǵan.
Sonymen qatar ustalǵandardyń urlyq pen qaraqshylyqqa barǵany úshin buryn qylmystyq, oǵan qosa birneshe ret ákimshilik jaýapkershilikke tartylǵany anyqtaldy.
Qazirgi kezde quqyq buzýshylardyń bireýine qatysty buryn sottalǵan qaýipti sanatqa jatatyn tulǵa retinde neǵurlym qatań baqylaýǵa alý úshin ákimshilik qadaǵalaý ornatý jóninde sotqa materıal daıyndalýda.
Atalǵan derek boıynsha Tasqala aýdandyq ishki ister bólimi qyzmettik tekserý júrgizýde.
