BQO-da Podstepnyı aýylynda sý basqan úıler sany eseptelip jatyr
ORAL. KAZINFORM — Batys Qazaqstan oblysy Terekti aýdany Podstepnyı aýylynda sý basqan úıler sany eseptelip jatyr. Bul týraly brıfıngte BQO TJ departamentiniń bastyǵy Rýslan Qasybaev málim etti.
Departament bastyǵynyń aıtýynsha, óńirde apattyq-qutqarý jumystary jalǵasýda.
Qazirge deıin oblys boıynsha 3 744 adam evakýatsııalansa, sonyń 1 455-i – balalar. Qaýipsiz jerge 900-den astam iri qara, 1800 bas usaq mal, 30 jylqy aıdaldy.
Barlyǵy 640 myńnan astam qar sýy sorylyp, 104 myńnan astam qapshyq tóseldi.
Óńirde 1 myńnan astam adam (300-den astam tehnıka, 100-den astam motopompa) jumyldyrylyp, kúsheıtilgen rejımde jumys jasaýda.
«Shyńǵyrlaý, Jaqsybaı, Óleńti, Buldyrty ózenderiniń sýy arnasynan asýy saldarynan tórt aýdannyń 9 aýylynda 384 úı sýǵa ketti. Bul kórsetkishter naqtylaný ústinde, jergilikti atqarýshy organdardyń komıssııasy teksergennen keıin shyǵyn eseptelip, sýǵa ketken úılerdiń dál sany anyqtalady. «Qazgıdromet» RMK BQO fılıalynyń málimetine qaraǵanda, búginnen bastap kún jylyna túsip, soǵan baılanysty qaýip saqtalady. Turǵyndardy tynyshtyq saqtap, evakýatsııaǵa daıyn bolýǵa shaqyramyn», - dedi R.Qasybaev.
Podstepnyı aýyldyq okrýginiń ákimi Meıirbek Sultanov ta qazirgi kezde sýǵa ketken úıler sany eseptelip jatqanyn jetkizdi.
Aýyl turǵyndarynyń sózine qaraǵanda, sý 31 naýryzǵa qaraǵan túni kele bastaǵan.
«Meniń úıimdi 31 naýryz kúni tańǵy saǵat 9-da sý basty. Oǵan deıin keminde elý shaqty úıdi qarǵyn sý alyp ketti. Esiktiń aldyn ekskavator qazyp tastaǵandyqtan, úıden eshteńe alyp shyǵa almadyq. Endi ne bolaryn bilmeımiz», - deıdi aty-jónin atamaýdy ótingen turǵyn.
Turǵyndardyń habarlaýynsha, sýmen arpalys búgin túnde jalǵasty. Aýyldaǵy mádenıet úıi, qazaq mektebi, keminde 100 úı sýǵa ketken. Qaýip áli seıilgen joq.
Adamdardyń birqatary Oral qalasyndaǵy týystarynyń úıine ketse, qalǵandary Podstepnyı aýylyndaǵy «Terekti» kolledji jáne oblystyq daryndy balalarǵa arnalǵan Abaı atyndaǵy mamandandyrylǵan mektep-gımnazııa-ınternaty ǵımaratyna ornalasty.
Atalmysh aýylda 12 myńnan astam adam turady.
Eske sala keteıik, budan buryn BQO-da Elek ózeninde sý deńgeıi qaýipti deńgeıden asyp ketkenin jazǵan bolatynbyz.
Sondaı-aq BQO-da sý tasqyny kezinde pyshaqtalǵan qutqarýshy aýrýhanada em alyp jatyr.
