BQO-da pedagogtarǵa 250 mln teńgeden astam ústemeaqy tólenbegen
ORAL. KAZINFORM – Batys Qazaqstan oblysynda pedagogtarǵa 250 mln astam teńge ústemeaqy tólenbegen.
QR Sybaılas jemqorlyqqa qarsy is-qımyl agenttigi BQO boıynsha departamentiniń baspasóz qyzmetinen málim etkenindeı, monıtorıng barysynda Syrym aýdanynyń pedagogtaryna 259 mln tenge kóleminde ústemeaqy tólemeý faktileri anyqtaldy.
«Azamattyq qyzmetshilerge memlekettik bıýdjet qarajaty esebinen ustalatyn uıymdardyń jáne qazynalyq kásiporyndardyń qyzmetkerlerine eńbekaqy tóleý júıesine sáıkes osy tulǵalarǵa erekshe eńbek jaǵdaılary úshin laýazymdyq jalaqynyń 10 paıyzy mólsherinde ústemeaqy belgileý qajet. Alaıda Syrym aýdanynyń bilim bólimi 2020-2023 jyldar kezeńinde 26 bilim berý uıymynyń 1 195 qyzmetkerine erekshe eńbek jaǵdaılary úshin laýazymdyq jalaqynyń 10 paıyzy mólsherinde jalpy somasy 259 mln teńge kóleminde ústemeaqyny tólemegen. Departamenttiń aralasýymen Syrym aýdanynyń bilim bólimi tarıftik tizimge ózgerister engizip, jalaqyny qaıta eseptedi, kináli tulǵalar tártiptik jaýapkershilikke tartyldy» dep habarlady vedomstvodan.
Eske sala keteıik, budan buryn jemqorlyq týraly habarlaǵan BQO-nyń 4 turǵyny 5 mln teńge syıaqy alǵanyn jazǵan bolatynbyz.
