BQO-da paıdalanylmaı jatqan 909,8 myń gektar aýyl sharýashylyǵy jeri anyqtaldy
NUR-SULTAN. QazAqparat – Batys Qazaqstan oblysynda sońǵy eki jylda 909,8 myń gektar paıdalanylmaıtyn aýyl sharýashylyǵy maqsatyndaǵy jerler anyqtaldy, dep habarlaıdy QazAqparat tilshisi.
Oblys ákimi Ǵalı Esqalıevtiń Ortalyq kommýnıkatsııalar qyzmeti alańynda ótken brıfıngide málim etkenindeı, sonyń 113 myń gektary memleketke qaıtaryldy.
Bıylǵy on aıda aýyl sharýashylyǵy jalpy óniminiń kólemi 1,6 paıyzǵa kóbeıip, 167,7 mlrd teńgeni qurady. Saladaǵy eńbek ónimdiligi ekinshi toqsanda 1,7 esege ósip, 720 myń teńgege jetti. Al ınvestıtsııalar kólemi 2,8 esege ulǵaıǵan.
Ákimniń sózine qaraǵanda, óńirde etti mal sharýashylyǵyn damytýǵa basymdyq berilýde.
Іri qara mal basy boıynsha BQO respýblıkada tórtinshi orynda. Asyl tuqymdy iri qara mal ósirý jóninen úzdik úshtikti túıindeıdi. Al etti baǵyttaǵy iri qara malyn ósirý boıynsha oblys ekinshi satyda tur.
Memleket basshysynyń aýyl sharýashylyǵy kooperatıvterin biriktirý tapsyrmasy boıynsha Tasqala aýdanynda pılottyq jobany júzege asyrý kózdelýde. Ol úshin birqatar kedergilerdi joıý qajet. Osyǵan oraı Aýyl sharýashylyǵy mınıstrligine arnaıy usynys joldandy. Eger usynys qoldaý tapsa, aýyl turǵyndarynyń tabysy artatyn bolady.
«Búginde óńirdegi mal sharýashylyǵyn dóńgeletip otyrǵan sharýalar iri qara maldy tabıǵı jaıylymdy jerlerde ósirip otyr. Al dalada ósken maldyń ekologııalyq taza ónim beretini barshaǵa aıan. Keńes dáýiri kezinde oblystaǵy jaıylym jerler kólemi 13 mln gektarǵa jetken. Al qazir biz tek 7 mln gektar jerdi paıdalanyp otyrmyz. ıAǵnı óńirdiń mal sharýashylyǵyn damytýdaǵy múmkindigi mol. Óıtkeni osyndaı taza, ekologııalyq ónimge suranys ta óte joǵary», dedi Ǵ.Esqalıev.
