BQO-da paıdalanylmaı jatqan 468 myń gektar jer memleketke qaıtaryldy
ORAL. KAZINFORM — «Jer amanaty» jobasy aıasynda qaıtarylǵan jerler halyq ıgiligine berilip jatyr, dep habarlaıdy «AMANAT» partııasy Batys Qazaqstan oblystyq fılıalynyń baspasóz qyzmeti.
Memleket basshysy Qasym-Jomart Toqaevtyń tapsyrmasy boıynsha 2022 jyldyń basynan beri paıdalanbaı jatqan jáne Qazaqstan Respýblıkasynyń zańnamasyn buzyp berilgen aýyl sharýashylyǵy maqsatyndaǵy jerlerdi memleketke qaıtarý jumystary aıasynda «AMANAT» partııasynyń janynan qurylǵan aımaqtyq «Jer amanaty» komıssııasy qarqyndy jumys atqaryp keledi.
Jalpy «AMANAT» partııasynyń «Jer amanaty» komıssııasy atqarǵan jumys aıasynda Batys Qazaqstan oblysynda 2022 jyldan beri 468 134 gektar jer memleket menshigine qaıtaryldy. Sonyń ishinde memleket menshigine qaıtarylǵan jerdiń 97206 gektary keri paıdalanýǵa berildi. Atap ótý kerek, bul jerler aýyl mańyndaǵy jerler, aýyl halqynyń suranysyna oraı qaıtarylǵan jerdiń kópshiligi jaıylymdyq maqsatta aýyl halqyna berilip otyr. Sebebi búgingi tańdaǵy aýdan jáne aýyl-aımaqtaǵy suranys osyndaı bolyp otyr.
— Statıstıkalyq málimetterge sáıkes, Shyńǵyrlaý aýdanynda 400-ge jýyq sharýa qojalyqtary bar. Jer komıssııasy arqyly paıdalanylmaı jatqan jerlerdi memleket menshigine qaıtarý jumystaryn júrgizdik. Nátıjesinde josparlanǵan 5000 gektardyń ornyna bıylǵy jyly 8200 gektar jer qaıtaryldy. Qaıtarylǵan jerler keri aınalymǵa engizilip, mal azyǵy sapasyn jaqsartý maqsatynda 1 jyldyq jáne kóp jyldyq shópterdi egý maqsatyna paıdalanýǵa berilip jatyr, — dep atap ótti Shyńǵyrlaý aýdany ákiminiń orynbasary Azamat Bısembaev.
Batys Qazaqstan oblysy Shyńǵyrlaý aýdany Aqtaý aýylynda paıdalanbaı memleketke qaıtarylǵan 600 ga aýyl sharýashylyq jer ýchaskesin aýdandyq «Jer amanaty» komıssııasy usynysy boıynsha, «Amanaı» sharýa qojalyǵyna paıdalanýǵa berildi. Kóp ýaqyttan beri mal sharýashylyǵymen aınalysyp júrgen kásip ıesi shabyndyq jáne jaıylymdyq jerdiń azdyq etýinen konkýrsqa qatysyp, memleket menshigine qaıtarylǵan jerdi paıdalanýǵa alǵan.
— Osy mal sharýashylyǵymen aınalysatyndar jaqsy biledi, bul kásipte eń bastysy jaıylymdyq jerdiń jaqsy bolýy, sonymen qatar shabyndyq jer bolsa, kásibiń alǵa basady. Qazir osy baǵdarlamamen jer alyp, shópti shabýǵa arnalǵan tehnıka alyp, ózimiz shaýyp, qysqa azyq daıyndap, bıylǵy maýsymdy aıaqtadyq. Sıyr sútin saýyp, ónimin aýyl turǵyndaryna jetkizip kelemiz. Kásibimizdi damytýǵa, keńeıtýge múmkindik bergen «Jer amanaty» jobasyna alǵysymyzdy bildiremiz. Osy joba múmkindikterin jastar da paıdalansa degim keledi, sebebi ata kásipti damytý, qolǵa alý jastardyń qolynda, — dedi Saǵatjan Orazov.