BQO-da páter ıeleri kooperatıvteriniń teń jartysyna jýyǵy taratylady
ORAL. KAZINFORM — BQO ádilet departamentiniń málimeti boıynsha oblysta barlyǵy 84 páter ıeleri kooperatıvi (PIK) jáne páter ıeleri tutyný kooperatıvi (PITK) tirkelgen.
BQO energetıka jáne turǵyn úı-kommýnaldyq sharýashylyq basqarmasy basshysynyń orynbasary Qanat Ómirálıevtiń málim etkenindeı, sonyń ishinde úsheýi osy kezge deıin taratylsa, 14-i áreketsiz bolyp esepteledi.
Qanat Amangeldiulynyń sózine qaraǵanda, 27 PIK qaıta tirkeýden ótken. Al 40-y nemese jartysyna jýyǵy qaıta tirkeýden ótpegen.
— Zańnamaǵa engizilgen ózgeristerge sáıkes PIK jáne PITK ótken jylǵy 17 shildeden bastap bir jyl ishinde qaıta tirkeý rásiminen ótýge mindetti edi. Endi zańda belgilengen merzimde qaıta tirkeýden ótpegen kooperatıvter sot tártibimen májbúrli túrde taratylady. Olardy sotqa qala men aýdan ákimdikterdiń turǵyn úı-kommýnaldyq sharýashylyq jáne avtomobıl joldary bólimderi beredi, — dedi Qanat Ómirálıev.
Onyń aıtýynsha, qazirgi tańda oblysta 2 533 kóppáterli turǵyn úıdiń 259-y múlik ıeleri basqarý nysanynda bolsa, 1 964-i tikeleı birlesip basqarý nysanynda. 168 úıdiń basqarý nysany joq, al 69-y kommýnaldyq menshikte.
Eske sala keteıik, budan buryn Batys Qazaqstanda 70-ten astam kóppáterli turǵyn úı apatty dep tanylǵanyn jazǵan edik.
