BQO-da para alǵan memlekettik qyzmetshige 8,8 mln teńge aıyppul salyndy
BQO sybaılas jemqorlyqqa qarsy is-qımyl departamentinen túsken málimetke qaraǵanda, oblystyq jolaýshylar kóligi jáne avtomobıl joldary basqarmasynyń bas mamany D.Ótegenov QR QK 336-baby 2-bólimine sáıkes aıypty dep tanyldy.
Oral qalalyq sotynyń úkimimen ol sondaı-aq ómir boıy memlekettik qyzmetpen aınalysý quqyǵynan aıyryldy.
Úkim zańdy kúshine endi.
Qylmystyq is qujattaryna sáıkes D.Ótegenov 2019 jyldyń qazan aıynda Qaztalov jáne Jańaqala aýdandarynda oblystyq mańyzy bar joldardy aǵymdaǵy jóndeý jáne kútip ustaý boıynsha oryndalǵan jumystar aktilerine qol qoıý arqyly JShS ókilinen 220 myń teńge para alǵan.
Óziniń qyzmet babyn paıdalanǵan bas maman merdigerlerden aı saıyn syıaqy talap etken.
Aqyry ótken jyldyń 18 qazanynda kezekti para kezinde ustalǵan D.Ótegenovtiń ámııanynan 1,29 gramm marıhýanaǵa uqsas zat ta tabyldy.
Medıtsınalyq kýálandyrý qorytyndysyna sáıkes ol esirtkige eltigen mas kúıinde bolǵan.
Bul derek boıynsha QR QK 296-baby 2-bóligine (ótkizý maqsatynsyz esirtki zattaryn zańsyz ıemdený) sáıkes qylmystyq is tergeý úshin BQO polıtsııa departamentine joldandy.
Sonymen qatar qylmystyq quqyqbuzýshylyq jasaýǵa yqpal etken jaǵdaılardy joıý jóninde sharalar qabyldaý maqsatynda oblys ákimi apparatyna QPK-niń 200-baby tártibimen tıisti usynym jiberildi.
Tıisti baqylaýdyń joqtyǵy jáne qaraýyndaǵy qyzmetkerlermen aldyn alý jumystarynyń jetkiliksizdigi úshin BQO jolaýshylar kóligi jáne avtomobıl joldary basqarmasy basshylyǵyn tártiptik jaýaqa tartý týraly máseleni qarastyrý usynyldy.