BQO-da para alǵan laýazymdy qyzmetkerge 60 mln teńge aıyppul salyndy

ORAL. QazAqparat – Oral qalalyq sotynda QR Eńbek jáne halyqty áleýmettik qorǵaý mınıstrligi Eńbek jáne áleýmettik qorǵaý komıteti BQO boıynsha departamentiniń qyzmetkerlerine qatysty úkim shyqty, dep habarlaıdy QazAqparat tilshisi.

BQO boıynsha sybaılas jemqorlyqqa qarsy qyzmetinen málim etkenindeı, atalǵan departamenttiń medıtsınalyq-áleýmettik saraptama basshysy Baqytjamal Bekqojına QR QK 366-baby 3-bóligi 4-tarmaǵyna (para alý) sáıkes aıypty dep tanyldy.

Sot úkimimen B.Bekqojınaǵa paranyń 60 eselengen kóleminde 60 mln teńge kóleminde aıyppul salyndy.

Osy úkimmen paraqorlyqqa deldal bolý deregi boıynsha dáriger-nevropatolog Rımma Telbaeva aıypty dep tanylyp, oǵan paranyń 20 eselengen kóleminde 6 mln teńge aıyppul túrindegi jaza kesildi.

Olardyń ekeýi de memlekettik qyzmette jáne kvazımemlekettik sektor nysandarynda laýazymdardy atqarý quqyǵynan ómir boıyna aıyryldy.

Sot úkimi zańdy kúshine engen joq.

Eske sala keteıik, budan buryn Oral qalasynda azamattardy turǵyn úı kezeginen shyǵarý, páter bólý tóńireginde daý shyqqanyn jazǵan bolatynbyz.