BQO-da para alǵan departament basshysyna 19,5 mln teńge aıyppul salyndy

ORAL. QazAqparat – Oral qalalyq sotynda BQO memlekettik múlik jáne jekeshelendirý departamentiniń burynǵy basshysy Darhan Qýanyshevqa qatysty úkim shyqty, dep habarlaıdy QazAqparat tilshisi.

Oral qalalyq sotynan túsken málimetke qaraǵanda, D.Qýanyshev QR QK 366-baby 2-bóligine (aıtarlyqtaı mólsherde para alý) sáıkes aıypty dep tanylyp, oǵan paranyń 30 eselengen, ıaǵnı, 19,5 mln teńge kóleminde aıyppul salyndy.

Sonymen qatar ol memlekettik basqarý organdarynda laýazymdy qyzmet atqarý quqyǵynan ómir boıyna aıyryldy.

Sot barysynda anyqtalǵanyndaı, bıylǵy 20 sáýirde departament pen «Aqsaı Grant» jeke kásipkerligi arasynda departamenttiń jáne 9 aýdandyq basqarmanyń ákimshilik ǵımarattaryn keshendi ustaý jáne qyzmet kórsetý boıynsha memlekettik satyp alý kelisimsharty jasalǵan.

Departament basshysy D.Qýanyshev qylmystyq áreketin júzege asyrý maqsatynda mamyr aıynyń ortasynda «Aqsaı Grant» JK atynan kásipkerlik qyzmetti atqaryp júrgen Mırbolat Muhamedzıanovtan («Aqsaı Grant» JK basshysy A.Muhamedzıanovanyń jubaıy) oryndalǵan jumys aktilerine kedergisiz qol qoıý jáne jalpy qamqorshylyq úshin jalpy somanyń 10 paıyzy kóleminde para berýin talap etken. Buǵan M.Muhamedzıanov kelisken. 26 mamyr kúni D.Qýanyshev 2,5 mln teńgeniń jumysy oryndalǵany jóninde aktige qol qoıǵan. Bir kúnnen keıin «Arasan» saýnasynda otyryp, M.Muhamedzıanovtan izin jasyrý nıetimen týysy D.Bajırovtyń esepshotyna 250 myń teńgeni aýdarý kerektigin aıtqan. Sol kúni «WhatsApp» mesendjeri arqyly týysynyń «Kaspi Bank» AQ-ǵa tirkelgen telefon nómirin jibergen. 29 mamyr kúni N.Muhamedzıanov D.Bajırovke 250 myń teńgeni aýdarǵan. Sol kúni D.Bajırov D.Qýanyshevtiń qylmystyq áreketine kúdiktenbesten, «Kaspi.kz» qosymshasy arqyly 215 myń teńgeni jáne «Olimpbet.kz» býkmekerlik keńsesindegi jeke esepshotyna 30 myń teńgeni aýdarǵan.

Maýsym aıynyń basynda D.Qýanyshev óziniń qylmystyq áreketin jalǵastyryp, M.Muhamedzıanovtan 100 myń teńge para talap etken. Bul áreket te aldyndaǵydaı jolmen júzege asqan.

Sodan keıin osy aıdyń sońynda taǵy da 300 myń teńge kóleminde para alǵan.

Osylaısha, D.Qýanyshev M.Muhamedzıanovtan jalpy kólemi 650 myń teńge kóleminde para alǵan.

QR QK 367-baby 2-bóligine sáıkes aıypty dep tanylǵan M.Muhamedzıanov shyn ókinýine baılanysty QR QK 65-baby 1-bóligi negizinde qylmystyq jaýapkershilikten bosatyldy.

Sot úkimi kúshine engen joq.

Eske sala keteıik, budan buryn «tramadol koroline» qamqorshylyq jasaǵan BQO polıtseılerine úkim shyqqanyn jazǵan bolatynbyz.