BQO-da para alǵan aýdıt bóliminiń basshysyna 12 mln teńge aıyppul salyndy
BQO sotynyń baspasóz qyzmetinen túsken málimetke qaraǵanda, BQO boıynsha ishki memlekettik aýdıt departamentiniń bólim basshysy K.Ermekqalıeva aýdıt júrgizý barysynda BQO Din isteri basqarmasy men «Din máselelerin zertteý ortalyǵy» KMM-nyń qarjylyq-sharýashylyq qyzmetinen zańbuzýshylyqty anyqtaǵan.
Aýdıttik tekserýdiń oń qorytyndysyn shyǵarý úshin K.Ermekqalıeva atalmysh basqarma basshysy S.Ǵızzatovtan 200 myń teńge kóleminde para talap etken. Al S.Ǵızzatov óz kezeginde «Din máselelerin zertteý ortalyǵy» KMM-nyń basshysy A.Ábdirahmanovty K.Ermekqalıevaǵa atalǵan qarjyny berýge kóndirgen.
K.Ermekqalıeva para alý ústinde sybaılas jemqorlyqqa qarsy is-qımyl Ulttyq bıýrosy BQO boıynsha departamenti qyzmetkerleriniń qolyna túsken.
Oral qalalyq sotynyń úkimimen K.Ermekqalıeva QR QK 366-baby 2-bóligine sáıkes aıypty dep tanylyp, oǵan paranyń alpys eselengen mólsherinde, ıaǵnı 12 mln teńge aıyppul salyndy.
S.Ǵızzatov QR QK 28-baby 4-bóligi, 367-baby 2-bóligine sáıkes aıypty dep tanylyp, oǵan paranyń otyz eselengen mólsherinde, 6 mln teńge aıyppul salyndy.
Olardyń ekeýi de memlekettik qyzmette, ózin-ózi basqarý organdarynda laýazymdy qyzmet atqarý quqyǵynan ómir boıyna aıyryldy.
Sot úkimi zańdy kúshine engen joq.