BQO-da para alǵan aýdandyq aýrýhana basshysy úsh jylǵa sottaldy
ORAL. KAZINFORM — Qaratóbe aýdandyq sotynda aýdandyq aýrýhana dırektorynyń mindetin atqarǵan Jasulan Nurahýnovqa qatysty úkim shyqty.
Sot talqysynda málim bolǵanyndaı, aýrýhana basshysyna QR QK 366-baby 2-bóligine sáıkes aıyp taǵyldy.
Sottalýshy memlekettik fýnktsııalardy oryndaýǵa ýákilettik berilgen adamǵa teńestirilgen tulǵa bola tura, sybaılas jemqorlyq sıpatyndaǵy aýyr qylmysty jasaǵan.
Atap aıtqanda, 2025 jylǵy 6 qańtarda aýrýhana jáne «KDL OLIMP» JShS Batys Qazaqstan fılıaly arasynda tegin medıtsınalyq kómektiń kepildik berilgen kólemi jáne mindetti áleýmettik medıtsınalyq saqtandyrý júıesi aıasynda birlesip oryndaýshy retinde medıtsınalyq qyzmetter kórsetý týraly shart jasalǵan. Osy jylǵy 3 qarashada «KDL OLIMP Kaspıı» JShS Batys Qazaqstan fılıalymen taǵy bir shart jasalǵan.
2025 jyldyń jeltoqsan aıynyń basynda aýrýhana dırektorynyń mindetin ýaqytsha atqarýshy J.Nurahýnov zerthanalyq zertteýler júrgizý boıynsha medıtsınalyq qyzmetter kórsetkeni úshin «KDL OLIMP» JShS BQF jáne «KDL OLIMP Kaspıı» JShS BQF shottaryna aýdarylǵan bıýdjettik qarajattan 10 paıyz mólsherinde aqsha túrinde para alý jóninde qylmystyq oıǵa berilgen.
Sodan keıin 11 jeltoqsanda «KDL OLIMP» JShS BQF jáne «KDL OLIMP Kaspıı» JShS BQF dırektorynyń mindetin atqarýshy J.Amrıshevpen kezdesip, oryndalǵan jumystar aktilerine kedergisiz qol qoıýy jáne jalpy qamqorlyǵy úshin atalǵan sharttar negizinde aqsha qarajatynyń jalpy somasynan 10 paıyz mólsherinde para talap etken. Sol kezde J.Amrıshev óz kelisimin bergen.
«Áleýmettik medıtsınalyq saqtandyrý qory» KEAQ-dan qarjylandyrý nátıjesinde, ıaǵnı 2025 jylǵy 24-25 jeltoqsan jáne bıylǵy 22 qańtarda aýrýhanadan «KDL OLIMP» JShS BQF jáne «KDL OLIMP Kaspıı» JShS BQF shotyna zerthanalyq zertteýler júrgizý boıynsha kórsetilgen medıtsınalyq qyzmetter úshin jalpy somasy 3 020 410,07 teńge bıýdjet qarajaty aýdarylǵan. Sonyń 10 paıyzy 300 myń teńge bolǵan.
2026 jylǵy 12 mamyrda J.Amrıshev J.Nurahýnovtyń áreketteri zańsyz ekenin uǵynyp, QR UQK BQO boıynsha departamentine jazbasha aryzben júgingen.
Bıylǵy 13 mamyrda saǵat 18.40 shamasynda J.Nurahýnov Qaratóbe aýylynda J.Amrıshevten medıtsınalyq qyzmetter kórsetý boıynsha oryndalǵan jumystar aktilerine kedergisiz qol qoıǵany jáne jalpy qamqorlyǵy úshin 300 myń teńge aıtarlyqtaı mólsherde para alǵan.
J.Nurahýnov múlkin tárkileýsiz, úsh jyl merzimge bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteýge sottaldy. Sonymen qatar ol memlekettik qyzmette, sýdıa qyzmetin, jergilikti ózin-ózi basqarý jáne basqa organdarda laýazymdardy atqarý quqyǵynan ómir boıyna aıyryldy.
Sot úkimi zańdy kúshine engen joq.
Eske sala keteıik, budan buryn BQO densaýlyq saqtaý basqarmasynyń basshysy qyzmetinen shettetilgenin jazǵan edik.
Madııar Óteshev Facebook áleýmettik jelisindegi paraqshasynda 7 shilde kúni basqarma basshysy retindegi qyzmetin aıaqtaǵanyn jazdy.
