BQO-da óziniń týysyn óltirgen turǵyn 12 jylǵa sottaldy
ORAL. KAZINFORM – BQO qylmystyq ister jónindegi mamandandyrylǵan aýdanaralyq sotynda Ermek Mustahımǵa qatysty úkim shyqty.
Sottyń baspasóz qyzmetinen málim etkenindeı, Jánibek aýdanynyń turǵyny QR QK 99-baby 1-bóligine (adam óltirý, ıaǵnı basqa adamdy quqyqqa qarsy qasaqana qazaǵa ushyratý) sáıkes aıypty dep tanyldy.
Oqıǵa bıylǵy mamyr aıynyń 18-inen 19-yna qaraǵan túni Jánibek aýylynda boldy.
Sottalýshy óziniń úıinde bóle týysymen alkogoldi ishimdik ishken. Sonyń barysynda ekeýi sózge kelip, daý týyndap, arty janjalǵa ulasqan.
Sottalýshy bólesiniń aıaǵynan shalyp, jerge qulatyp, moınynan eki ret pyshaq jumsaǵan.
Qansyrap jatqanyn kórip, birneshe ret aýyr soqqy jasaǵan. Sodan keıin betine, keýdesi men ishine keminde 12 ret pyshaq siltegen. Sol jerde jan tapsyrǵan marqumnyń máıitin qylmysyn jasyrý maqsatynda óz úıiniń artyndaǵy qoqys shuńqyryna aparyp, kómip tastaǵan.
E.Mustahım 12 jylǵa bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteýge sottaldy.
Jábirlenýshiniń moraldyq zalaldy óndirý týraly azamattyq talap aryzy ishinara qanaǵattandyryldy.
Úkim zańdy kúshine engen joq.
Eske sala keteıik, budan buryn Oralda avtokólik qaǵyp ketken er adamnyń mert bolǵanyn jazǵan edik.
