BQO-da ózine zańsyz syıaqy alǵan sheneýnikti qyzmetinen bosatý usynyldy

ORAL. KAZINFORM – QR Memlekettik qyzmet isteri agenttigi BQO-daǵy ádep jónindegi keńes otyrysynda memlekettik qyzmetshilerdiń tártiptik isteri qaralyp, tıisti sheshimder qabyldandy.

Otyrys barysynda málim bolǵanyndaı, Jánibek aýdany sáýlet, qala qurylysy jáne qurylys bóliminiń basshysy Manarbek Ádıev qyzmet babyn teris paıdalanǵan.

Atap aıtqanda, bólim basshysy burynnan bar tártiptik jazasy alynbaǵanyn bile tura, ótken jyl sońynda ózine 766 myń teńge kóleminde syıaqy alǵan.

Keıin bul qarajat bıýdjetke qaıtarylǵanymen, memlekettik qyzmetshiniń abyroıyna nuqsan keltiretin teris qylyq bolyp esepteledi. Sondyqtan ádep jónindegi keńes M.Ádıevti qyzmetinen bosatý týraly aýdan ákimine usynys jasady.

Sondaı-aq Aqjaıyq aýdandyq jumyspen qamtý jáne áleýmettik baǵdarlamalar bóliminiń basshysy Farhad Ýahıtov ınvataksı qyzmetin kórsetý salasynda birqatar buzýshylyqqa jol bergen. ıAǵnı ınvataksı qyzmetin usynatyn ónim berýshiniń biliktilik talaptaryna saı kelmeıtin avtokólikpen múgedekter tasymaldanǵan. Sol úshin tıisinshe tólem júrgizilgen.

F.Ýahıtovqa qatysty qyzmetine tolyq sáıkes emestigi týraly eskertý berý usynyldy.

Eske sala keteıik, budan buryn BQO-da turǵyndardy malǵa teńegen aýyl ákimine sógis berý usynylǵanyn jazǵan bolatynbyz.