BQO-da ózen arnasynan asyp, jol jıegin sý shaıdy
ORAL. QazAqparat – Batys Qazaqstan oblysynda ózen sýynyń deńgeıi kóterilip, joldy shaıyp ketti, dep habarlaıdy QazAqparat tilshisi.
BQO Tótenshe jaǵdaılar departamentiniń baspasóz qyzmetinen málim etkenindeı, oqıǵa 8 aqpan kúni saǵat 19.00-de Báıterek aýdany Rýbejın aýylynyń shetinde oryn aldy.
3 aqpannan 6-syna deıin jańbyr men qardyń jaýýynan Rýbejka ózeniniń deńgeıi kóterildi. Sonyń saldarynan ýaqytsha aınalma avtojoldy (eni 6 metr, uzyndyǵy 30 metr) sý shaıyp ketti.
Negizgi kópir ótken jyldyń qyrkúıek aıynan beri kúrdeli jóndelip jatqandyqtan (qosalqy merdiger – «Anýsh» JShS), aınalma jol salynǵan bolatyn. Degenmen avtokólik qozǵalysyna shekteý qoıylǵan joq. Qazir ózen arnasy túsýde, eldi mekenderdi sý basý qaýpi joq.
«Oqıǵa ornyna departament basshylyǵy da bardy. Ózen baqylaýda», - dep habarlady departamenttiń baspasóz qyzmetinen.
