BQO-da ózbekstandyq azamattardy tasymaldaǵan «Gazel» júrgizýshisi jaýapqa tartyldy
ORAL. QazAqparat - 17-19 qańtar kúnderi BQO aýmaǵynda «Avtobýs» jedel aldyn alý sharasy júrgizilýde, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, 17 qańtar kúni «Rýbej-Oral» beketinde «Voronej-Shymkent» baǵytynda ketip bara jatqan «Gazel» avtokóliginiń júrgizýshisi toqtatylyp, onyń QR ákimshilik zańnamasyn buzǵandyǵy anyqtaldy.
Atalǵan júrgizýshi QR Ákimshilik quqyqbuzýshylyq kodeksiniń birden úsh baby boıynsha, atap aıtqanda, 572-baby 2-bóligi (jolaýshylardy, bagajdy nemese júkterdi avtomobılmen tasymaldaýdy júzege asyrý kezinde júrgizýshilerdiń eńbek jáne demalys rejıminiń buzylýy), 593-baby 3-bóligi (jol júrisi qaǵıdalarynda kózdelgen jolaýshylardy jáne júkterdi tasymaldaý, qaýipsizdik beldikterin nemese motoshlemderdi paıdalaný jónindegi talaptardy saqtamaý) jáne 590-baby 10-bóligine (kólik quraldaryn paıdalaný qaǵıdalaryn buzý) sáıkes jaýapqa tartyldy.
Júrgizýshiniń ózbekstandyq azamattardy tasymaldap bara jatqany belgili boldy. Degenmen kóshi-qon zańdylyǵyn buzýshylyq anyqtalǵan joq.
Aıta keteıik, 2018 jyly qoǵamdyq kóliktiń qatysýymen oblys aýmaǵynda 11 jol apaty bolyp, sonyń saldarynan 7 adam qaza tapty, 15-i túrli jaraqat aldy. Sonyń ishinde altaýy qoǵamdyq kólik júrgizýshisiniń kinásinen oryn aldy, munda 3 adam kóz jumyp, altaýy jaraqattandy.
Bıyl jyl basynan beri materıaldyq zalal keltirgen qoǵamdyq kóliktiń qatysýymen 6 jol-kólik oqıǵasy boldy.
Sonymen qatar 16-20 qańtar aralyǵynda respýblıkalyq «Mıgrant» jedel aldyn alý sharasy da júrgizilýde.
