BQO-da óz kásibin damytý úshin 286 adamǵa nesıe berildi
ORAL. QazAqparat - Memleket basshysy bıylǵy Joldaýynda shaǵyn nesıe berý aıasyn keńeıtip, kásipkerlerge kepildik jasaý jáne qyzmet kórsetý tetikterin belsendi paıdalaný kerektigin, jappaı kásipkerlikti qoldaý tetikterin odan ári jetildirý qajettigin atap kórsetken bolatyn. Osy baǵytta Batys Qazaqstan oblysynda naqty jumystar atqarylýda, dep habarlaıdy «QazAqparat» tilshisi.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń bólim basshysy Anar Amantaıqyzynyń aıtýynsha, Elbasynyń tikeleı tapsyrmasy boıynsha qolǵa alynǵan Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasynyń «Jappaı kásipkerlikti damytý» 2-baǵyty aıasynda oblys kóleminde 444 adamǵa (sonyń ishinde aýyldyq jerde 300, qalada 144 adamǵa) nesıe berý úshin 2363,7 mln teńge qarajat bólindi. Bıylǵy 1 qarashadaǵy málimet boıynsha 286 adam 1489,5 mln teńge nesıege qol jetkizdi. Sóıtip olar óz kásibin damytýǵa múmkindik aldy. Bul - memleket tarapynan úlken qoldaý.
Buǵan qosa «Bastaý bıznes» jobasy boıynsha 937 adamdy kásipkerlik negizderine oqytý josparlansa, kúni búginge deıin 895 adam oqýǵa joldandy.
Jalpy, atalmysh baǵdarlamany júzege asyrý maqsatynda oblysqa 3539,8 mln teńge bólinse, sonyń 3196,8 mln teńgesi qazirdiń ózinde ıgerilip otyr.
Baǵdarlamanyń 1-baǵyty («Baǵdarlamaǵa qatysýshylardy tehnıkalyq jáne kásiptik bilimmen jáne qysqa merzimdi kásiptik oqýmen qamtamasyz etý») aıasynda búgingi tańda 800 adam (jospar - 800) 22 kolledjge 13 jumysshy mamandyǵy boıynsha oqýǵa jiberildi. Sol sekildi eńbek naryǵynda suranysqa ıe túrli mamandyqtar boıynsha 2912 adam (jospar - 3132) qysqa merzimdi kýrstarda bilim alýda.
Baǵdarlamanyń 3-baǵyty («Halyqty jumyspen qamtýǵa járdemdesý jáne eńbek resýrstarynyń utqyrlyǵy arqyly eńbek naryǵyn damytý») boıynsha áleýmettik jumys oryndaryna 885-tiń ornyna 982 adam, jastar tájirıbesine 935-tiń ornyna 1488 jas maman joldandy. Oǵan qosa 6265 adam (jospar - 6073) aqyly qoǵamdyq jumystarǵa tartyldy.
«Nátıjeli jumyspen qamtý boıynsha aldaǵy ýaqytta da aýqymdy ister atqarylatyn bolady», dedi A.Amantaıqyzy.
