BQO-da óz áıelin kepildikke alǵan turǵynǵa úkim shyqty
ORAL. QazAqparat – BQO qylmystyq ister jónindegi mamandandyrylǵan aýdanaralyq sotynda Erlan Islamǵalıevke úkim shyqty, dep habarlaıdy QazAqparat tilshisi.
Sot úkimimen E.Islamǵalıev QR QK 110-baby 2-bóligi, 2-tarmaǵy, 1), 2), 4)-tarmaqshasy, 194-baby 4-bóligi 2)-tarmaqshasy, 261-baby 2-bóligi 4)-tarmaqshasy, 120-baby 2-bóligi 2)-tarmaqshasyna sáıkes aıypty dep tanylyp, túpkilikti jaza retinde 13 jylǵa bas bostandyǵynan aıyryldy.
Sottalýshynyń jazasyn qaýipsizdigi barynsha joǵary qylmystyq-atqarý júıesi mekemesinde óteý belgilendi.
Jábirlenýshiniń talaparyzy ishinara qanaǵattandyrylyp, 10 mln teńge moraldyq, 541 530 teńge materıaldyq zalal óndirildi.
Sot talqysynda anyqtalǵandaı, E.Islamǵalıev ótken jyldyń 28 qarashasynda áıeli Iraıda Islamǵalıevany kepildikke alý úshin ańshy pyshaǵyn, sosyn dúkennen F-1 oqý granatasyn alǵan. Sosyn Jáńgir han kóshesi, 13 mekenjaıynda ornalasqan áıeliniń notarıaldyq keńsesine kelip, ony kepildikke alǵan.
I.Eslamǵalıevany bosatý jóninde quqyq qorǵaý organdary qyzmetkerleri júrgizgen kelissóz bes saǵattaı ýaqytqa sozyldy. Osy merzimde E.Islamǵalıev ózine shampan sýsynyn, shokolad, tapansha, ushaq, ınkassatorlyq mashına jáne 100 myń AQSh dollaryn jetkizýdi talap etti. Onyń talaptaryn oryndaý úshin shampan, shokolad jáne zalalsyzdandyrylǵan tapansha berildi.
Sodan keıin keńsege eshkimniń kire almaıtynyna kózi jetken E.Islamǵalıev kúsh qoldanyp ári óltiremin dep qorqytyp, áıeliniń erkinen tys onymen eki ret jynystyq qatynas jasaǵan.
Kelissóz nátıjesinde I.Eslamǵalıeva bosatyldy.
Sonymen qatar E.Islamǵalıev 2017 jyly 1 qyrkúıekte kezekti turmystyq kıkiljiń barysynda qyzǵanysh saldarynan áıeliniń kishkentaı ulyn bólmege qamap, kúsh qoldanǵan. Úsh-tórt saǵat boıy balanyń kózine uıaly telefon shamynyń jaryǵyn túsirip, álsin-álsin óshirip-jaǵyp, onyń namysyna jáne júıkesine tıetin sózder aıtqan.
Áıeline kúsh qoldanyp, onyń eki qolyn jylý batareıasyna belbeýimen baılap tastap, aýzyna skotch japsyrǵan.
Kelesi kúni ájethanaǵa barǵysy kelgen áıeliniń shashynan súırep, tynys organdaryn kópshikpen basyp, oǵan páterin berýin talap etken. Bas tartqan jaǵdaıda kúsh qoldanatynyn aıtqan. Kelisim almaǵannan keıin 2 saǵat boıy jábirlenýshiniń kózine uıaly telefon shamyn túsirip, qınaǵan.
1-4 qyrkúıek aralyǵynda E.Islamǵalıev áıeli men onyń kishkentaı ulyn páterden shyǵarmaı, I.Islamǵalıevanyń ózine turmysqa shyqqanǵa deıin alǵan múlkin ıemdený maqsatynda kúsh qoldanyp, qorlaǵan.
Aqyry 4 qyrkúıek kúni ózi men ulynyń ómirine qaýip tóngendikten, Iraıda notarıýs keńsesine kúıeýine erip kelip, onyń atyna quny 14 840 855 teńge turatyn 3 bólmeli páterin rásimdegen.
Sodan keıin 2017 jyldyń qazanynan 2018 jyldyń qańtaryna deıin, sondaı-aq 2019 jyldyń aqpanynda áıeliniń polıtsııaǵa shaǵymdanýynan qaýiptengen E.Islamǵalıev ony únemi uryp-soqqan.
E.Islamǵalıevtiń kinási jábirlenýshilerdiń, kýágerlerdiń aıǵaqtarymen, saraptama qorytyndysymen tolyq dáleldendi.
Sot úkimi zańdy kúshine engen joq.
Eske sala keteıik, budan buryn BQO-da áıelin kepildikke alǵan er adamnyń isi sotqa joldanǵanyn jazǵan bolatynbyz.
