BQO-da otyz jyl burynǵy qyz zorlaý deregine baılanysty qylmystyq is qozǵaldy
ORAL. KAZINFORM — Qazirgi kezde shetelde turatyn áıel otyz jyl buryn er adamdardyń top bolyp ózin zorlaǵany jóninde áleýmettik jelide beınejazba jarııalady.
Onyń sózine qaraǵanda, sol kezde 17-18 jasta bolǵan, Batys Qazaqstan oblysyndaǵy túkpirdegi bir aýylda turǵan, shamamen tórt er adam zorlaǵan.
— Er adamdar meniń tórt aǵamnyń jan-jaqqa ketkenin paıdalandy. Bireýi oqýǵa, bireýi áskerge ketken edi. Men kishkentaı aýylda anammen turdym, ákem qaıtys bolǵan. Olar meni qaraýsyz qalǵan úıge aparyp, kezekpen zorlady, uryp-soqty, qylǵyndyrdy. Men olardy otyrǵyzamyn dep ses kórsetkenimde, zorlaýshylardyń biri Jaıyq ózenine súırep aparyp, batyryp jiberemin dep qorqytty. Men sózimdi taǵy qaıtaladym. Olar meni odan saıyn uryp, ózen jaǵasynda qaldyryp ketti. Tańǵa jaqyn álsiz, kıimsiz kúıimde oıandym, — deıdi áıel.
Keıin kishkentaı ulymen elden ketken, jasy elýge jaqyndaǵan ol Vetnamda turady.
— Qazir mende bári jaqsy sekildi. Ómir súrip, eńbek etip jatyrmyn, ulym bedeldi ýnıversıtette oqıdy. Ony ózim úshin týdym. Biraq men sol qaıǵyly jaǵdaıdy umytqan joqpyn. Psıhologtar kómektese almady, jeke ómirimdi qura almadym, óıtkeni sodan keıin erkekterdi jek kóremin, — dep qosty áıel.
Ol endi Oralǵa kelip, aıaǵyna deıin baryp, ózin zorlaǵandardy jaýapqa tartýǵa bekingenin jetkizdi.
BQO polıtsııa departamentiniń baspasóz qyzmeti naqtylaǵanyndaı, atalǵan derek boıynsha qylmystyq is qozǵaldy.
— Barlyq dáıekter sotqa deıingi tergeý arasynda zertteletin bolady. Basqa aqparat QR Qylmystyq is júrgizý kodeksiniń 201-babyna sáıkes jarııalaýǵa jatpaıdy, — dep habarlady vedomstvodan.
Eske sala keteıik, budan buryn BQO-da jasóspirimdi zorlady degen kúdikpen ustalǵan burynǵy sheneýniktiń kóz jumǵanyn jazǵan bolatynbyz.
