BQO-da otbasyndaǵy zorlyq-zombylyqqa qatysty úsh kúnde 30-ǵa jýyq áıel senim telefonyna habarlasty
ORAL. QazAqparat – Batys Qazaqstan oblysynda turmystyq zorlyq-zombylyqtyń aldyn alý jáne jolyn kesý baǵytynda keń kólemde «Otbasyndaǵy zorlyq-zombylyqqa jol joq!» sharasy ótkizildi, dep habarlaıdy QazAqparat tilshisi.
BQO polıtsııa departamenti málim etkenindeı, 13-15 qarasha aralyǵynda ótken sharaǵa túrli uıymdardyń 441 ókili jumyldyryldy.
Turǵyndardyń quqyqtyq saýattylyǵyn arttyrý maqsatynda polıtsııa qyzmetkerleri basqa da uıymdar ókilderimen birlese otyryp, kitapshalar taratyp, turmystyq zorlyq-zombylyqtan zardap shekkenderdiń is-qımyl algorıtmi túsindirildi. Barlyǵy 1897 materıal taratylyp, úılerdiń kireberisterine senim telefondary men saıt mekenjaılary jazylǵan habarlandyrýlar ilindi.
Kámeletke tolmaǵandar isteri jónindegi ýchaskelik polıtsııa ınspektorlary jataqhanalarda turyp jatqan áıelderge baryp, olardyń quqyqtary men mindetterin túsindirdi.
Oblystyq daǵdarys ortalyǵynda turmystyq zorlyq-zombylyqtan zardap shekken áıelderge quqyqtyq keńes berildi.
Negizinen áıelder jumys jasaıtyn memlekettik mekemelerde polıtsııa qyzmetkerlerimen kezdesýler uıymdastyryldy.
Otbasyndaǵy zorlyq-zombylyqtyń aldyn alý maqsatynda oblys mektepterinde mektep ınspektorlary ZOOM tásilimen ata-analar jınalystaryn ótkizdi.
Osyndaı jıyndar kolledjderde de ótti. Aıtalyq, Oral qalasy polıtsııa basqarmasy ıývenaldyq polıtsııa bólimshesiniń aǵa ınspektory, polıtsııa maıory Mádına Quspanova A.Imanova atyndaǵy avtojol kolledji 1-2 kýrs stýdentteriniń ata-analarymen otbasynda dástúrli qundylyqtardy ornyqtyrý, quqyqtyq tárbıe berý baǵytynda áńgimelesti.
«Meniń osy salada jumys istep kele jatqanyma 16 jylǵa jýyqtady. Jasóspirimder arasynda qylmys pen quqyqbuzýshylyqtyń aldyn alý, otbasynda zorlyq-zombylyq derekterin boldyrmaý jolynda budan bylaı da eńbektene beremiz», deıdi M.Quspanova.
Sol sekildi BQO polıtsııa departamenti ıývenaldy polıtsııa tobynyń ınspektory, polıtsııa kapıtany Dılıara Satarova Batys Qazaqstan ındýstrıaldy kolledji 1 kýrs stýdentteri ata-analarymen onlaın kezdesý ótkizdi.
Shara ótken úsh kún ishinde otbasyndaǵy zorlyq-zombylyqqa baılanysty 29 áıel senim telefonyna qońyraý shaldy. 25 áıelge quqyqtyq, 15-ine psıhologııalyq kómek kórsetildi. Osy kezeńde 15 aryz-shaǵym tirkelip, otbasynyń shyrqyn buzǵan 5 adamǵa QR Ákimshilik quqyqbuzýshylyq kodeksiniń 73-babyna sáıkes hattama toltyryldy. Sondaı-aq úsh quqyq buzýshyǵa qatysty ýchaskelik polıtsııa ınspektorlary qorǵaý uıǵarymdaryn engizdi.
Aıta keteıik, Batys Qazaqstan oblysynda 277 ýchaskelik polıtsııa ınspektory, olardyń 61 kómekshisi qyzmet etedi. Jyl basynan beri ýchaskelik ınspektorlar 2 myńnan astam qylmysty ashty. 22 myńnan astam quqyqbuzýshylyqtyń joly kesilip, azamattardyń 30 myńnan astam ótinishi qaraldy.
